Isumat.com/2:15PM, July 16, 2020
Nakatalwas ha peligro hi Mayor Vicente Limpiado Jr han pusilon hiya hin waray pa kakilal-i nga suspetsado kanina han aga ha Brgy Sogod, Tagapul-an, Samar.
Subay han inisyal nga imbestigasyon, hi Limpiado in tigawas na unta han iya farm kanina han alas 8:50 han aga han tigda la may dumaop ha iya nga lalaki ngan pusilon an alkalde. Naigo ha taludtod hi Limpiado pero nakahimo hiya hin pakadalagan samtang ginpipinusil pa hiya.
Kinmalagiw an suspetsado katapos la han insidente. Padayon an ginbubuhat nga imbestigasyon han mga otoridad.
Hi Limpiado in kadagmitan nga gindara ha Rural Health Unit han bungto ngan iginbalhin ha ngadto hin usa nga hospital ha Catbalogan City.
An Tagapul-an in usa nga isla nga munisipalidad han Samar ngan ginkokomponer hin 14 nga barangay.
