Isumat.com/7:25AM, July 17, 2020

Mahugot nga ginkondenar ni Samar Governor Michael Reynolds Tan an natabo nga pag-ikaparatay kan Vicente Limpiado Jr, an Mayor han Tagapul-an, kakulop nga adlaw.

Nagsering hi Tan nga nakikig-urusa hiya ha mga Samarnon pagkondenar hini nga binuhatan nga deri makatawo labi na yana nga naatubang kita hin pandemya tungod han COVID-19. Ini nga pag-ikaparatay han alkalde in binuhatan hin waray kasingkasing nga mga indibiduwal, pahayag han gobernador.

Para kan Tan ini nga panhitabo in usa nga “Political Violence” ngan ini in padayon nga natatabo ha syahan nga distrito han probinsya. Nagpapaki-ana an amay han probinsya kun san-o pa mahugpoy ini nga bayolente nga mga panhitabo didto han nasabi nga distrito.

An 1st District han Samar in ginkokomponer han Calbayog City ug mga bungto han Tagapul-an, Gandara, Sta Margarita, Almagro, Matuguinao, Pagsanghan, San jorge, Sto Nino ngan Tarangnan.

Kadungan hini, nagpasalamat an gobernador nga nakasalbar hi Limpiado han pag-ikaparatay ha iya. Hi Limpiado in pinusil hin deri pa kilalado nga suspetsado kakulop han aga samtang tigawas hiya han iya umhanan didto ha Tagapul-an. An 47-anyos nga alkalde in gintatambal yana ha usa nga hospital.

Naglalaum an gobernador nga ma-aresto hin kadagmitan an mga suspetsado ug an mga personalidad nga utok han krimen.

Naka-eskapo naman an mga suspetsado ngan padayon ginhahalpat han mga tinubyanan han balaud. Hi PNP Chief Archie Gamboa in nagmando ha PNP-Region 8 nga buhaton an ngatanan basi umatubang ha hustisya an nagpapaluyo han krimen.

Hi Limpiado in nagseserbe han iya ikaduha nga termino komo alkalde han Tagapul-an. Hiya in lumiwan han iya amay nga nagin mayor han nasabi nga bungto.

An Tagapul-an in bungto nga namumutang ha isla. Sobra duha ka oras an byahe tikadto hini nga lugar tikang ha Calbayog pinaagi hin sarakyan pandagat. Mayda hini 14 nga barangay ngan ginklasipikar nga 5th Class municipality. #