Isumat.com/8:50AM, July 18, 2020
Waray exempted hini nga bag-o nga patakaran han Land Transportation Office (LTO). Ngatanan nga magre-renew hin driver’s licence in magpapailarum hin 15 ka oras nga Theoretical Driving Course.
Sumala han LTO, iginpapasunod ini ha bug-os nga Pilipinas ngan deri la denhi ha Region 8 ngan waray hini makakalusot nga drayber.
In inga Theoretical Driving Course in pagdudumaraon han mga Driving Schools nga may akreditasyon tikang ha LTO. Antis maka-renew han driver’s license, maagi hini nga proseso . Waray liwat igpahayag han ahensya kun pira an bayad hini nga aktibidad.
Nagklaro an LTO nga angay la nga magkaada hin sugad hini nga proseso kay lima na ka tuig an validity han lisensya pagmaneho.
Usa ini nga pitad han ahensya basi mapahinumdom an mga drayber han ira mga obligasyon ngan balaud han trapiko. Na-obserbaran han ahensya nga nagtitikadamo an saragwakon nga nagmamaneho hin sarakyan ha kakalsadahan.
Mas iistriktohan na gihapon yana han LTO an pagseguro nga an mga indibiduwal nga naangay magkapot hin sarakyan amo la an tatagan hin lisensya. #
