Isumat.com/9:15AM, July 18, 2020
Siyam nga pasyente an naka-recover ngan usa an bag-o nga natapnan han COVID-19 ha Eastern Visayas kakulop (Hulyo 17). Ini in subay han report han DOH Regional Office.
Hinungdan hini, dida han 668 nga nagpositibo han kagaw, 631 ha ira an nakatalwas na tikang han impeksyon ug ini in 94 porsyento nga recovery rate.
An bag-o nga nagpositibo in 21-anyos nga babaye nga taga Mahaplag, Leyte. Umabot hiya tikang ha Manila hadton Hunyo 27 sakay hin pribado nga behikulo. Hiya in kaupod ha byahe han 37-anyos nga babaye nga taga Mahaplag gihapon nga naha-una nga nagpositibo.
Nagpahayag an LGU-Mahaplag nga ini nga pasyente in waray pa igka-upod han iya pamilya kay deretso ngadto ha Quarantine Unit han bungto tikang han iya pag-abot. Nagdugang pa an LGU nga maupay an panlawas han pasyente ngan waray sintomas han virus.
Hapagkayana, 34 nala an active cases nga ginmomonitor han mga otoridad ha panlawas. Nagpapabilin naman nga tulo ka tawo an namatay tungod han corona virus.
Dida han 108 nga health workers nga natapnan, duha nala an gintatambal ug an iba nakalibre na tikang han kagaw.
444 han mga nagpositibo an mga Locally Stranded Individuals kun diin kadam-an ha ira in nakabalik pinaagi han Hatid-Probinsya. 52 naman an mga OFWs ngan tulo an benefeciario han Balik-Probinsya Program. #
