Isumat.com. July 19, 2020

Nagpapabilin nga hitaas an recovery rate han mga pasyente han COVID-19 ha Sinirangan Bisayas ngan yana nga adlaw, Hulyo 19, aada ini ha 95 porsyento. Dida han 670 nga nagpositibo han virus, 639 na an nakatalwas.

Dida han gibabag-uhi nga report han DOH, mayda siyam nga bag-o nga nakarecover, ngan 36 nala an active cases.

Mayda naman duha nga bag-o nga nahipatik nga natapnan han virus ug hira in tikang ha Carigara ngan Baybay City.

Sumala han LGU-Carigara, an bag-o nga pasyente in 32-anyos nga babaye nga residente han Brgy Tagak. Usa hiya nga OFW nga umabot ha ira bungto hadton Hulyo 5, 2020 tikang ha Saudi Arabia. Antis hiya umabot, pira ka adlaw nga nag-istar anay hiya ha Manila ngan negatibo pa ngani an iya swab result ha Manila hadton Hunyo 27.

Pag-abot niya ha Carigara, deretso hiya ha quarantine unit ngan ginkuhaan utro hin swab nga nagpositibo an resulta. Waray hiya iginka-urusa nga iba nga tawo tikang han iya pag-abot labot la han mga health personnel nga nagmomonitor han iya kahimtang.

An bag-o naman nga Positive Case ha Baybay City in 35-anyos nga babaye tikang ha Cavite. Hiya in residente han Brgy Bunga han nasabi nga syudad. #