Isumat.com/8:47AM, August 11, 2020
Tumalikod ha kadayunan in usa nga Locally Stranded Individual (LSI) didto ha San Francisco, Southern Leyte.
Subay han pahayag han LGU-San Francisco, an namatay in 20-anyos nga lalaki nga residente han Brgy Sta Paz Sur. Umabot hiya ngadto han bungto tikang ha Cavite hadton Agosto 1. Hiya in naka-kwarentina ha Tuno Elementary School.
Bisan kun waray niya iginpapakita nga sintomas han Covid-19, ginkuhaan hiya hin swab sample kay an iya iginkasakay ha eroplano nga taga-iba nga bungto in nagpositibo han virus. An resulta han swab test in waray pa gumawas tobtob yana.
Kakulop (Agosto 10) banda alas 8 han aga, nadiskubrehan han mga personales han LGU nga waray bubuhat tikang han iya katre an lalaki, ngan han ira panginano, waray na ini kinabuhi.
Basar han pagsusi han Rural Health Unit, an hinungdan han iya kamatay amo an “Acute Hemorrhagic Pancreatitis” o tinatawag ini nga “bangungot.”
Tungod kay deri paman tapos an duha ka semana nga kwarentina, iginlubong dayon han LGU an patay nga lawas han nasabi nga LSI. #
