Isumat.com/7:23AM, August 5, 2020
Kadam-an nga mulopyo ha Eastern Visayas in nagpabati hin pagkabaraka dara han nagtitikadamo nga kaso han COVID-19 nga deri natutudlok kun paunan-o natapnan an pira nga nagpositibo han virus.
Dida han bag-o nga 36 nga Positive Cases nga iginreport kakulop (Agosto 4) han DOH Regional Office, usa nga pasyente an posible makonsiderar nga Local Transmission. Amo ini an 77-anyos nga lalaki nga taga Brgy Villa Aurora, Basey, Samar. Iginpahayag han LGU-Basey nga Local Resident an pasyente ngan waray travel history.
Hadton Agosto 1, nagpakunsulta hiya ha Basey District Hospital dara han paghimakuri pag-ginhawa ngan ginsagdunan nga magpa-admit ha EVRMC. Antis pa hini, hiya in sulod-gawas ha hospital dara han iya sakit ha kasing-kasing ngan pulmonya. Ginkuhaan hiya hin swab test hadton Agosto 2 ngan gumawas kakulop an resulta nga positibo hiya han COVID. Hinungdan hini, ginhihimo yana han LGU an contact tracing basi maseguro nga matudlok an iginka-urusa han pasyente ngan mahipa-ilarum hira hin kwarentina ngan Isolation.
Han una nga adlaw, ginkumpirmar ni Palo Mayor Ann Petilla an natabo nga Local Transmission ha iya bungto.
An kaso ha Lawaan, Eastern Samar in gin-iimbestigar pa yana kay deri liwat natutudlok kun diin katapni an senior citizen nga babaye.
An namatay nga pasyente ha Calbayog kakulop in waray gihapon detalye kun LSI o nakabalik nga OFW.
Mayda na gihapon iginreport hanhadi nga mga Local Transmission nga natabo ha Tacloban, Hilongos, La Paz ngan Carigara.
Kun amo ini an sitwasyon ginkakabarak-an nga posible bumutho pa in sugad hini nga mga kaso kay deri man natutudlok kun hin-o an nakatapon ngan diin katapni an mga nagpositibo. Dako an posibilidad nga may mga tawo nga nagdadara han kagaw nga aadi ha gawas ngan padayon nga nagsusudoy-sudoy. Posible deri hira maaram nga positibo hira han virus sanglit nakakatapon hira ha iba nga tawo.
Umabot na ha 1,035 an natapnan ngan 704 (68%) an naka-recover ha Eastern Visayas. Hapagkayana, mayda 328 an Active Cases ha rehiyon. #
