Isumat.com/8:09AM, August 5, 2020
Magpapadara hin mga personales an DOH Eastern Visayas ngadto ha Metro Manila basi umayuda ha mga hospital pagtimangno han mga pasyente han COVID-19.
Nagsumat hi John Paul Roca, tagpamulong han DOH-Region 8, ini an kabatunan han ahensya ha panawagan han DOH Central Office hin kadugangan nga personales tungod han waray wantas nga pagtikadamo han nagpopositibo ha National Capital Region.
Nagsering hi Roca nga porlomenos 20 nga mga doktor ngan nurses an ira pakakadtu-on ha NCR. Ini nga mga personales in magtitikang ha Schistosomiasis Hospital-Palo, EVRMC, ngan TRC-Dulag. Pero waray pa petsa han ira pagbiyahe ngadto ha Manila, dugang pa ni Roca.
Hadin nag-agi nga pira ka adlaw, iginproponer hin pira nga sektor nga kinahanglan na hin tambulig tikang ha mga probinsya kay deri na naa-akos han mga health personnel an nagsasapin-sapin nga pasyente ha Manila. Gin-aprobaran na ngani ni Presidente Duterte an hangyo han health personnel ha Manila nga igbalik an Enhanced Community Quarantine kay deri na hira nakakadiskanso ngan kinakapoy na hin duro tungod han waray hunong nga pagpa hospital han mga natatapnan han virus.
Nagsumat pa hi Roca nga posible pan-ngaranan na yana nga adlaw o buwas kun hira hin-o an igpapadara ngadto ha Metro Manila. #
