Isumat.com/7:30PM, September 8, 2020
Bisan kun mayda na kamanduan tikang ha Malakanyang nga an Tacloban City in aada ha General Community Quarantine tikang Setyembre 1 tobtob Setyembre 30 yana nga tuig, nagpalusad la gihapon hin Executive Order hi Mayor Alfred Romualdez para hini nga panuyu-anan.
Temprano pa yana nga gab-i, hi Romualdez an nagpirma han Executive Order 2020-09-038 kun diin iginlalarang an pagpahilawig han GCQ tobtob hiton katapusan hini nga bulan. Hanhadi han Agosto 24, hi Romualdez an nagbutang han syudad ha GCQ tungod han tigda nga paghitaas han nagpopositibo han Covid-19 dida han iya nasasakupan. Matatapos unta ini nga kamanduan yana nga adlaw, Setyembre 8.
Pero tungod han bag-o nga kasugu-anan, tobtob na ha Setyembre 30 an GCQ ha Tacloban.
Ha ilarum hini nga iya mando, mahugot an pagpatuman han pagsul-ot han face mask ngan face shield ha pampubliko nga transportasyon. Lakip gihapon an curfew tikang alas 9 han gab-i tobtob alas 4 han maagahon.
Ginsasagda gihapon an publiko nga gamiton gud an QR Code Pass ha ira mga transaksyon ha mga tindahan ngan mga opisina.
Na-igo gihapon hini nga mando an pinan-ngunguhaw na nga mga alsa-baso kay an liquor ban in tobtob gihapon ha Setyembre 30. Mahugot nga deri tutugutan an pagbaligya, pagpalit ngan pag-inom hin makahurubog nga irimnon bisan diin nga parte han syudad hini nga panahon.
Hapagkayana, umabot na 538 an natapnan han virus ha Tacloban. Dida hini nga ihap, 195 an naka-recover, 339 an Active Cases ngan upat na nga Covid Patient an namatay. #
