Isumat.com/ 4:02AM, June 9, 2020

Gin-aandam na yana han Taft Police Office an kaangayan nga mga kaso nga posible igsampa kontra kan Councilor Marvin Lim ug han iya kag-anak nga hira Engr Diego ngan Elsa Lim upod hi Dr. Imelda Abenio. Ini in dara han alegasyon nga waray sumunod han Health Protocols nga iginpapatuman han Eastern Samar Provincial Government an pamilya.

Subay han pahayag ni Governor Ben Evardone ha social media, hira Konsehal Lim ug an iya kag-anak in umabot kakulop tikang ha Manila sakay hin pribado nga behikulo. Pag-abot nira ha border checkpoint, gin-abisuhan hira han Chief of Police han bungto nga kinahanglan mag-kwarentina hira ha Taft Central School subay han ginpapatuman nga guidelines.

Nanginlabot daw an Municipal Health Officer ngahi Dr. Imelda Abenio ngan nagsering nga imbes nga ha Taft Central School, didto nala ha Mantang Elementary School magka-kwarentina an pamilya. Ini nga hangyo ni Abenio in gintangdu-an han kapulisan.

Han tikadto na hira ha Brgy Mantang, tigda nga lumikdo an behikulo han pamilya ngadto han Katrina Beach Resort nga hira an tag-iya ngan kadagmitan ginsadhan an gate. Nakalasan an kapulisan nga escort hini nga gi-os han pamilya Lim ngan waray na hira makabantay ug nakasulod han ira pribado nga propyedad.

Hi Taft Mayor Gina Ty in nagsumbong kan Evardone nga han ti-abot pala hira Konsehal Lim, naghangyo na ha iya hi Abenio nga mag Home Quarantine nala hira Lim tungod kay deri hira mamumutang hin maupay kun didto hira ha Taft Central School Quarantine Facility.

Nagsering hi Evardone nga ini nga ginawi-an han pamilya in pagpakita hin pagigin arogante labi na an konsehal nga imbes hiya an magigin susbaranan hin maupay nga pamatasan, hiya lugod an tumalapas han mga aludayday nga ginpapasunod yana dara han COVID-19 pandemic.

Dako ini nga insulto ha mga otoridad ngan nagbubutang ha peligro han katalwasan han mga mulopyo han lalawigan. Iginsaad ni Evardone nga magbabaton ha balaud hira Konsehal Lim. Gintagan hin duon han gobernador nga iya obligasyon an pagpanalipod han katalwasan han iya nasasakupan. An Taft PNP in nangangandaman nayana hana mga kaso nga igsasampa kontra han pamilya sugad man kan Abenio.

Sering pa man han gobernador, kinahanglan magin patas an pagpatuman han balaud kay bisan ngani an mga na-stranded nga Estehanon ha Manila ngan mga OFW in nasunod man han patakaran. Igindig-on ni Evardone nga waray espesyal nga pagtagad ha bisan hin-o ha pag-implementar han balaud. # (KEVIN SIOSANA)