Isumat.com/Enero 27, 2022
Nagpapadayon an ginbubuhat nga imbestigasyon han kapulisan kasumpay han nahitabo nga shooting incident ha Sta Fe, Leyte hadin nakalabay nga adlaw kun diin an biktima in nag-antos hin igo hin bala.
Subay han PNP report, an biktima in ginkilala nga hi Rodolfo Tanola, 47 anyos, habal-habal driver, ngan nag-uukoy ha Brgy Katipunan han mao nga bungto.
An biktima in ti-uli na unta ngan samtang nagmamaneho han motorsiklo in tigda ginpusil hin duha nga suspetsado nga waray panhikilal-i.
Nag-antos hin kasamdan an biktima ngan gindara ha hospital basi pagtambalon.
Samtang, didto naman ha Hilongos, Leyte, usa nga lalaki an nagpakamatay ug igin-aalegar nga depresyon an nagduso han biktima nga tiwasan an iya kinabuhi.
Dida han inisyal nga imbestigasyon, an biktima ginkilala nga hi Danilo Calvez, 47 anyos, inasaw-an, waray trabaho in nakit-an nala han iya amyaw nga nabitay na an patay nga lawas didto han ira barangay ha Hitupdan, Hilongos, Leyte.
Gintutudlok nga an iya pagproblema han naguba nga ira balay han bagyo amo an hinungdan han iya depresyon.
An mga imbestigador in waray nakit-an nga foul play dida han insidente subay han panguna nga imbestigasyon. #
