Isumat.com/8:15AM, July 03, 2020
Waray na mahihimo an probinsya an Leyte kundi an pagsunod nala han kamanduan ni Presidente Duterte nga igbalik ha mas istrikto nga General Community Quarantine (GCQ) tikang han Modified GCQ. An Presidente in nagbutang han Leyte ha GCQ tikang Hulyo 1 tobtob Hulyo 15, 2020.
Ginkasarabutan han National Inter-Agency Task Force ngan mga LGU nga pira ka adlaw antis an bag-o nga deklarasyon han Presidente kasumpay han Community Quarantine, susumatan anay han Task Force an mga LGU kun ano nga klase hin kwarentina an igpapasunod ha ira lugar basi mayda pa panahon hin pag-apilar kun deri na-abuyon an LGU han plano han National Task Force.
Hi Leyte Governor Mic Petilla in nagsaysay nga han Hunyo 26 pala, maaram na hiya nga GCQ an igpapatuman ha Leyte, sanglit nakig-istorya hiya ha mga mayors han lalawigan ngan nagkasarabot hira nga igpabilin an MGCQ kay akos man han probinsya nga timangnu-on an mga pasyente han COVID-19.
Pagka Hunyo 27, hi Petilla in nagpadangat hin mensahe ha National Task Force nga mag-aapilar an Leyte nga MGCQ an dapat igpadayon ngan deri GCQ. Nagsering an National Task Force nga kinahanglan magsurat ha Regional Task Force basi igrekomendar han Regional Task Force an hangyo han probinsya.
Han Hunyo 28, hi Petilla in nagsurat ha Regional Task Force naghahangyo nga MGCQ an ig-implementar ha Leyte. Naglaum an gobernador nga igpapadara han Regional Task Force an iya hangyo ngadto ha National Task Force.
Pag-abot han Hulyo 1, igin-anunsyo ni Duterte nga igbubutang an Leyte ha GCQ . Nakalasan ngan napa-usa hi Petilla kay nag-apilar man hiya. Iya gintawagan an National Task Force mahitungod han iya formal appeal nga iginpadara ha Regional Task Force. Pero nagsering an National IATF nga waray hira nakarawat tikang ha Regional Task Force nga surat. Dara hini, nagpapaki-ana yana an gobernador kun nahinga-in an iya surat.
Nagsering pa hi Petilla nga deri hiya maaram yana kun ano an ginhimo han Regional Task Force han iya surat. An Regional IATF in pinangungunahan ni DOH Regional Director Minerva Molon. Han una nga adlaw, nagpabati hin kabido hi Petilla tungod kay iginpresentar daw han DOH Regional Office ngadto han National Task Force nga waray kapas o kulang na an Isolation Facilities han Leyte para han mga COVID Positive Cases. Nagtatahap hi Petilla nga posible amo ini an rason nga iginbalik ha GCQ an Leyte.
Ginklaro naman han gobernador nga bisan kun deri ini amo an karuyag han probinsya, masugot nala hira kay amo man an nagin desisyon han Presidente. An DOH in waray pa maghatag hin kabatunan hini nga isyu tobtob ginsusurat ini nga notisya. #
