Isumat.com/9:00AM,July 3, 2020

Padayon an pagka-abot han mga OFWs tikang ha magkalainlain nga parte han kalibutan nganhi ha Eastern Visayas. Hi Overseas Workers Welfare Administration (OWWA) Regional Director Sergio Borgueta an nagpahayag nga 2,102 na nga OFWs an umabot ha aton rehiyon tikang magkaada han krisis dara han corona virus.

Ini nga mga OFWs in nagkabalik tungod kay tapos na an kontrata, nagsara an kompaniya ngan nagbabakasyon. Igindugang pa ni Borgueta nga ginbabanabana nga maabot pa hin 15 mil nga OFWs an mabalik ha Region 8 tobtob Disyembre 2020. Kasagaran han mga nagkaka-uli in tikang ha Middle East.

Maabot naman hin 1,500 han mga naka-uli an naka-agom na han tag-10 mil nga ayuda pinansyal tikang ha OWWA. An iba naman in ginpoproseso pa an mga dukumento ngan ginpapahulat-hulat la para han hinabang ha ira.

Mayda gihapon iglulunsad nga programa an National Government para han mga OFWs ug tatawagon ini nga “Tulong sa Pag-unlad,” pahayag pa ni Borgueta.

Dida han mga naka-uli ha Sinirangan Bisayas nga OFWs, 48 ha ira an nagpositibo han COVID-19. Ha pagbanabana ni Borgueta, ngatanan hini nga nagpositibo in maupay an kahimtang han panlawas ug kadam-an na an naka-recover.

An mga OFW nga naabot ha Manila in ginkukuhaan dayon hin swab test ngan papa-ukyon ha hotel. Kun gumawas na an resulta nga negatibo han virus, papasakyon na hira tikadto han probinsya kun diin kukuhaon hira han LGU ha airport ngan magka-kwarentina na liwat hin duha ka semana ha ira bungto. #