Isumat.com/4:00PM,June 21, 2020

Naawat an kinabuhi hin usa nga gin-aaligar nga lider han New Peoples’ Army ug an iya batos han makigpinusilay hira kontra han mga operatiba han gobyerno kakulop (HUnyo 20) didto ha Brgy Bagacay, Palapag, Northern Samar.

Sumala han report han 20th Infantry Battalion han Philippine Army, an mga kasundaluhan ug an mga operatiba han Police Mobile Force Company in nagdudumara hin operasyon han ira igkahibalag hira Zaldy Meraya (alias Podyot ngan Bato) nga gintutudlok komo finance officer han Squad 1-Sub Regional Committee Arctic ug an iya batos ngahi Bebe Tobino (alias Kidlat) nga miembro han Squad 1-Sandatahang Unit Propaganda Platoon han NPA.

An mga tinubyanan han balaud in magseserbe unta hin warrant of arrest para hin kaso nga murder didto han nasabi nga lugar han ira matyempuhan ha usa nga saafehouse hira Meraya ngan Tobino. Ginhangyo han tropa nga sumurender an duha nga rebelde, pero nagpabuto lugod han ira pusil hinungdan nga nagkaada na hin pinusilay kun diin namatay an mga suspetsado.

Nakumpiskar tikang han mga rebelde in duha nga kalibre 45 nga pistola, usa nga laptop, 12 nga mga cell phones, tulo nga USB, ngan subersibo nga mga dokumento. Hi Meraya in gintutudlok nga usa han ginkakahadlukan nga extortionist o nagpipinantarhog basi makakuha hin salapi tikang hin mga kontratista ngan mga negosyante didto hini nga parte han Northern Samar.

Hi Col. Lowell Tan, Commander han 803rd Infantry Brigade in nagpahayag nga dara han kamatay ni Meraya, posible waray na matabo nga extortion han mga rebelde didto han mao nga lugar. # (KEVIN SIOSANA)