Isumat.com/8:41AM, October 14, 2020
Nagpapakabuhi la intawon amo nga nagpalawod pero nahi-abtan han disgrasya an duha nga mangirisda ha Eastern Samar ngan usa ha ira an namatay.
An mga mangirisda nga hira Domingo Buates, 52-anyos ug Lauro Bibon, 53-anyos ngan mga residente han isla nga barangay han Hilabaan, Dolores, Eastern Samar, in nagpalawod basi managat hadton Martes.
Iginkatuman hira han pagsubasko han kalalawdan ngan gintampalo hin dagko nga balud an ira subiran hinungdan han katiklob han ira sarakyan. Gintotoohan nga tungod han ti-arabot hadto nga Low Pressure Area ( nga nagin Bagyo Ofel) sanglit nagin maraot an panahon ha kadagatan.
Hi Buates in gintotoohan nga nalumos ngan iginsampig an iya patay nga lawas Mierkules han udto ha kabaybayunan han Brgy Cahagwayan, San Policarpo, Eastern Samar. Nakasalbar naman an iya upod ngahi Bibon. #
