Isumat.com/7:30AM, August 20, 2020

Umabot na ha 1,177 an nakatalwas tikang han infection han Covid-19 ha Eastern Visayas katapos la nga maka-recover kakulop (Agosto 19) an 66 nga pasyente, sumala han gibabag-uhi nga report han DOH Regional Office.

Ha luyo nga bahin, nadugangan hin 56 an natapnan han virus sanglit umabot na ha 1,821 an kabug-usan nga nagpositibo nga residente han rehiyon. Nagpapabilin nga 9 an Covid Patients nga namatay.

Kadam-an gihapon nga health workers an na-alakbatan han kagaw sanglit lomobo na ha 168 nga nagtatarabaho ha mga hospital ngan health centers an natapnan.

An Tacloban City an nag-antos han gidadamu-i nga bag-o nga kaso kakulop kun diin 22 an nahidugang nga pasyente han Covid. Walo ha ira an mga Frontliners, samtang an iba waray travel history ngan gintotoohan nagkatatapnan han mga naha-una nga nagpositibo han virus.

Ha Basey, Samar 12 an bag-o nga natapnan han kagaw. An pito in mga residente han Brgy Villa Aurora kun diin mayda na sobra 50 nga residente han barangay an natapnan. Lima liwat nga Frontliners han LGU-Basey an bag-o nga nagka impeksyon.

Pito naman an nahidugang ha Eastern Samar (Borongan-4, Oras-1, Salcedo-1, Arteche-1). Iginpahayag han Eastern Samar Provincial Health Office nga an mga natapnan ha Borongan, Oras ngan Salcedo in naka-assign ha Office of Civil Defense-Emergency Operations Command ha Leyte Park Tacloban. Han Agosto 7 pa lumakat ha Eastern Samar an nasabi nga mga Frontliners tikanhi ha Tacloban. An taga Arteche in nagtatrabaho naman ha EVRMC.

Tulo an bag-o nga pasyente ha Tarangnan. An usa hini in maiha na nga pasyente ha EVRMC ngan nagpositbo samtang naka-admit didto. Natapnan liwat niya an nagbabantay ha iya. An ikatulo in usa nga LSI.

Duha naman nga local resident ngan waray gumawas ha Region 8 an mga bag-o nga nagkatatapnan ha Naval, Biliran.

An duha nga bag-o nga kaso ha Tanauan, Leyte in nag positibo samtang naka-confine ha Divine Word Hospital ngan Schistosomiasis Hospital ha Palo.

An mga pasyente nga bag-o ha Calbayog in usa nga Frontliner ngan Health Care Worker, samtang mayda liwat Frontliner nga natapnan ha Sta Margarita.

Mga Frontliners gihapon an duha nga bag-o nga kaso ha Maasin City, Southern Leyte.

Dida han bag-o nga mga kaso kakulop sobra la 10 an mga LSI ug an iba naman mga local transmission, Health Workers ngan Frontliners. #