Isumat.com/7:30AM, July 31, 2020
920 na an nagkatatapnan han COVID-19 ha Eastern Visayas katapos la nga madugangan hin 57 nga bag-o nga Positive Cases kakulop (Hulyo 30, 2020). Iginreport gihapon han DOH Regional Office nga lima an naka-recover kakulop sanglit umabot na ha 664 (72%) an nakatalwas tikang han impeksyon.
Waray local transmission dida han bag-o nga mga nagpositibo. Ngatanan mga Locally Stranded Individuals an mga pasyente labot la hin usa nga OFW.
Ha probinsya han Samar, adi an mga lugar ngan ihap han nag positibo: Tarangnan-1, Villareal-2, Jiabong-2, Almagro-3, Catbalogan-4, Pagsanghan-2, San Jose de Buan-4, Sta Rita-1, Motiong-5, ngan Daram-3. Tobtob kakulop, umabot na 211 katawo dida han probinsya an nagkatatapnan han kagaw.
Ha luyo nga bahin, an Northern Samar in mayda na 40 nga natapnan kun diin 22 an naka-recover. An mga bag-o amo an masunod: Mapanas-1, Silvino Lobos-4, Capul-2, Gamay-3, ngan San Roque-1.
Ha Southern Leyte, lima an bag-o nga nahidugang ngan ngatanan hira residente han Maasin City. 113 na ngatanan an natapnan didto han lalawigan.
Ha probinsya han Leyte, adi an mga bag-o nga pasyente: Tunga-2, Palo-1, Baybay-1, Tanauan-2, Tolosa-2, Isabel-2, Abuyog-1, Carigara-1, Kananga-1, Albuera-1. An Leyte an may gidadamu-i nga nagpositibo han virus (388).
Ngatanan naman nag-negatibo ha virus an 164 nga personales han Divine Word Hospital nga ginpa-ilarum han swab testing. Ini nga pitad han hospital an ira ginhimo tungod han usa nga pasyente nga nagpositibo han kagaw hanhadi.
Dida han nagkatatapnan ha bug-os nga rehiyon, 621 an mga LSI, 61 an OFWs, 3 ha ilarum han Balik-Probinsya ug an iba Local/Community Transmission.
253 naman an Active Cases hapagkayana ngan nagpapabilin nga tulo nga pasyente han COVID an binawi-an han kinabuhi. #
