Isumat.com/8:32AM, July 31, 2020
Tungod han deri na niya paka-antos han kama-ol-ol nga iya gin-aabat dara han iya sakit, nagdesisyon in usa nga sundalo nga utdon na an iya kinabuhi.
Ini an nalutaw nga anggulo dida han inisyal nga imbestigasyon han Tacloban City PNP kasumpay han gin-aalegar nga pagpakamatay ni Army Staff Sgt. Reynaldo Alipo, 48-anyos ngan naka-destino ha Bato, Leyte. Hiya in nagpakamatay pinaagi han pagpusil han iya kalugaringon ha sulod mismo han iya kwarto ha ACE Medical Center, Marasbaras, Tacloban City.
Iginpahayag han report nga banda alas 5 kakulop han kulop, an bugto han biktima in nakakita nga kumuha hin pistola an iya ginbabantayan nga pasyente. Nagpruweba hiya nga agawon an pistola tikang han biktima, pero waray hiya makaka-agaw. Dara hini, nag-aro hiya hin bulig ngan pumakadto han kwarto in duha nga nurses. Nag-pruweba na liwat hira nga agawon an pistola, pero bumuto an pusil ngan nandadlagan tigawas han kwarto an duha nga nurses ug an bugto han biktima tungod han kahadlok.
Dida hini, nakalugar na hi Alipo han iya plano ngan pinaagi han 9mm Glock Pistol, iya pinusil an iya kalugaringon. Nag-antos hiya hin igo han bala ha wala nga parte han nawong.
Subay han pag-asoy han iya bugto, upat na ka adlaw nga naka-admit ha hospital an biktima. Maiha na daw ini nga nagrereniklamo han kama-ol-ol hin duro nga iya gin-aabat dara han iya sakit ha baga.
Iginsumat pa han bugto nga an pamilya han biktima in aadto ha Bohol. Negatibo ha COVID-19 hi Alipo dida han swab test antis hiya ig-confine ha hospital.
An Tacloban PNP in nag-iimbestigar pa kun kay-ano nga nakalusot man an armas de fuego han pasyente han pagpa-admit niya dida han mao nga hospital. #
