Isumat.com/7:11AM, September 13, 2020
Padayon an pagtikahitaas han mga nakaka-recover tikang han Covid-19 nga mga pasyente ha Eastern Visayas. Umabot na ini ha 3,019 katapos la hin bag-o nga 74 nga nakatalwas subay han report nga iginpagawas han DOH Regional Office kakulop, Setyembre 12.
Tungod hini, aada na ha 80 porsyento an recovery rate han rehiyon. Ha luyo nga bahin, aada na ha 3,738 an mga nagkatatapnan. 49 nga kaso an nahidugang dida han gibabag-uhi nga report han DOH.
Mayda naman nahidugang nga namatay nga pasyente han Covid. Hiya in 51-anyos nga taga Babatngon, Leyte nga binawi-an han kinabuhi kakulop. Hinungdan hini, 34 na nga Covid Patients han rehiyon an tumalikod ha kadayunan. Kasumpay hini, an LGU-Babatngon in nagmando hin temporaryo nga pag-undang han operasyon han ira Rural Health Unit basi magdumara hin disinfection sugad man contact tracing han posible iginka-urusa nga mga empleyado han RHU han namatay nga pasyente.
Dida han report han DOH, an Tacloban City in nadugangan hin 25 nga mga nagpositibo sanglit umabot na ha 638 an mga Taclobanon nga nagkatatapnan. Katunga han mga nagpositibo in naka-recover na ngan lima an namatay, subay han report han City Health Office. Ini nga paghinitaas han mga kaso dida han syudad in pinaagi han local transmission.
An probinsya han Samar an padayon nga nag-uuna dida han gidadamu-i nga natapnan, 1284, samtang nasunod an 1,170 tikang ha Leyte. An Southern Leyte in mayda 246, Northern samar 127, Biliran 101 ngan 52 para han Eastern Samar. #
