Isumat.com/3:03AM, September 13, 2020
Ha sulod la hin pira ka semana, ginbasag na liwat an kamurayawan ha bungto han Palo, Leyte han matabo an ambush han tipagsisirom kakulop, Setyembre 12, kun diin upat ka tawo an binawi-an hin kinabuhi.
Dida han inisyal nga imbestigasyon, banda alas 5:45 an takna han kulop, han pagpa-uranan hin bala hin deri pa kilalado nga mga suspetsado an busag nga pick-up nga ginsasakyan han upat nga biktima.
Ginsusulsog han awto han mga biktima an kalsada ha Brgy Libertad han tigda la nga pagpa-arakan hira hin bala. Iginmalatumat nga an mga suspetsado in sakay hin tulo nga mga behikulo.
Ginkilala an mga biktima nga hira Constantino Torre, 59 anyos; Dennis Monteza, 49-anyos; Ian Pat Cabrido 43-anyos; ngan Marites Tuscano, 46-anyos. Hira Torre ngan Monteza in mga retirado nga pulis ngan mga residente han nasabi nga barangay. Hi Dolina in taga Brgy Gindapunan, Palo samtang hi Tuscano in taga Brgy Macaalang, Dagami, Leyte.
Hi Torre in namatay dida mismo han lugar han krimen, samtang an tulo pa nga iba in gindara ha Leyte Provincial Hospital pero nagkamamatay gihapon. An mga suspetsado in kadagmitan naman nga umiskapo kataliwan han panhitabo. Padayon naman an imbistigasyon han mga otoridad.
May mga anggulo nga nalutaw nga may paghikanit ha iligal nga droga an usa han mga biktima.
Pira pala ka semana an nakalabay, an magtala-amay nga hira Pio ngan Ylphie Penaflor in pinanmusil ngan nagkamagtay dida han nasabi nga bungto. Hira in mga residente han Jaro pero gingama-an ha Palo samtang tikadto han Rehabilitation Center ha Dulag kun diin hira in mga Out-Patients nga nagpapa-ilarum han rehabiltasyon tungod han paghidabi hadto ha iligal nga droga. Luran hin itom nga SUV an mga nagpatay han magtala-amay.
Kun aton gihapon manunumduman, usa nga retirado nga pulis ha Tacloban an pinatay ha Brgy Abucay duha na ka bulan an nakakalabay. Paghagos hin usa ka bulan, pinusil ngan pinatay liwat hi Jason Golong ha Calinipawan, Tacloban. Dida hini nga mga insidente, SUV gihapon an gingamit nga sarakyan han mga suspetsado. Ini nga mga biktima in iginlalambigit gihapon ha illegal drugs. #
