Isumat.com/7:19AM, September 08, 2020
Ha luyo han paghinitaas han mga nagkakatatapnan han Covid-19 ha Eastern Visayas, nagtitikadamo gihapon an mga nakakatalwas tikang han sakit. Dida han iginpagawas nga report han DOH Regional Office han Lunes (Setyembre 7) mayda 58 nga naka-recover, sanglit 2,423 na an kabug-usan nga natambalan han impeksyon han kagaw.
Nadugangan naman hin 39 an mga natapnan sanglit an suma-total han nagpositibo ha bug-os nga rehiyon in aada na 3,442. Mayda naman namatay nga pasyente dida han Setyembre 6. Ini nga tawo in 57-anyos nga taga Catbalogan ug kumpirmado nga natapnan han virus, pero maiha na hiya nga nag-aantos hin Respiratory Illness. Tungod hini, 30 na nga Covid Patients ha rehiyon an tumalikod ha kadayunan.
Hapagkayana, 990 an mga Active Cases. Aada naman ha 331 an mga Health Care Workers an nagkatatapnan.
Dida han report kakulop han DOH, 12 an bag-o nga natapnan nga taga Calbayog City. Subay han pahayag han Calbayog-LGU, ini nga 12 nga natapnan in mga close contacts hin kumpirmado nga nagpositibo hanhadi. An syudad nga nagsasa-urog yana nga adlaw han ira kapistahan ha ilarum han Hard Border Lockdown in mayda na 70 nga residente nga natapnan han virus.
Walo naman an bag-o nga pasyente nga Catbaloganon. Ginlalakipan ini hin mga Frontliners ngan close contacts. 479 na an natapnan didto hini nga syudad ngan hapit na ha 300 an naka-recover. An Catbalogan in aada yana ha Enhanced Community Quarantine tungod han Covid Community Transmission.
Ha Tacloban City, lima an nahidugang nga kaso sanglit umabot na ha 544 an mga nagpositibo han kagaw nga mulopyo han syudad. Sobra 300 an mga naka-recover nga mga Taclobanon.
An probinsya han Samar an nagpapabilin nga nagdadara han gidadamu-i nga nagpositibo ha suma-total nga 1,217. An mga lugar han probinsya nga na-igo han damo nga mga kaso amo an Catbalogan (479), Villareal (171), Basey (121), Calbayog (70)Tarangnan (63) ngan Paranas (54).
1,069 an natapnan ha Province of Leyte kun diin an bungto han Palo in mayda 122, Baybay-60, Tanauan-59, Alangalang-50. An mga nagpositibo ha Ormoc City in sumaka na 119.
Ha iba naman nga mga probinsya, an mga nagpositibo ha Southern Leyte-233, Northern Samar-116, Biliran-98, ngan Eastern Samar-46. #
