Isumat.com/2:15PM, June 10, 2020
Nagdumara hin press conference an DOH Regional Office kanina han aga ngan nagpasamwak hira han gibabag-uhi nga sitwasyon han COVID-19 ha aton rehiyon.
An syahan nga isyu amo an pagseguro han DOH nga waray natatabo nga local transmission han virus ha aton rehiyon. Ini an nagin kabatunan han paki-ana kun mayda ba local transmission kay nagtitikadamo an natatapnan, labi na kakulop nga tigda nga 19 katawo an nahireport nga Positive Cases. Sumala kan Regional Director Minerva Molon, deri ini local transmission kay an nanhihidugang nga mga kaso han nag-agi nga mga adlaw in didto natapnan han kagaw ha iba nga lugar gawas han Eastern Visayas.
Iginreport gihapon han ahensya nga an natapnan nga taga Calubian, Leyte in lalaki nga residente han bungto nga naka-uli tikang ha Manila sakay hin pribado nga behikulo hadton Hunyo 5. Tikang han iya pag-abot deretso hiya ha Isolation Unit han bungto.
An syahan nga kaso ha Pastrana, Leyte in lalaki gihapon. Tikang hiya ha Cebu kun diin na-stranded hiya dara han lockdown ngan aadto ha Isolation Facility han LGU.
Dida han bag-o nga 6 nga kaso ha Baybay City, an lima ha ira in tikang ha Cebu nga na-stranded gihapon, samtang an usa in naka-uli tikang ha Manila ha ilarum han Balik-Probinsya Program. Naka-isolate ini nga unom katawo tikang han ira pag-abot ha Baybay.
Ha luyo nga bain, an 6 nga positibo ha San Isidro, Northern Samar in tanan residente han bungto nga na-stranded ha Manila. Umabot hira ha Tacloban sakay han barko han BFAR hadton Mayo 28, upod an nag positibo nga taga Jaro, Leyte. An ira isolation Unit nga gin-iistaran didto han ira bungto in usa nga resort gawas han munsipalidad.
An lima nga Ormocanon in na-lockdown didto ha Cebu ngan naka-uli hadton Mayo 30. Aadto hira ha Isolation Facility han syudad tikang han ira pakabalik.
Iginpahayag han DOH nga ini nga bag-o nga 19 nga kaso in maupay an panlawas tobtob yana ngan waray sintomas han sakit. Lima ha ira in sobra 60 anyos an edad.
Kaparte naman han nagpositibo ha Burauen han nag-agi nga semana, nagpahayag an DOH nga nakatalaan kuhaan han repeat testing an lalaki hiton Hunyo 13, ngan kun magnegatibo an resulta, makokonsiderar na hiya nga naka-recover. Naghimo hin contact tracing an mga otoridad kasumpay hini nga pasyente ug ngatanan han iya ginkahibalag upod an iya pamilya negatibo an resulta han confirmatory test.
Kasumpay naman han contact tracing para han pasyente ha Naval, Biliran, sobra hin 20 katawo an natudlok nga iginka-urupod han pasyente ug tanan negatibo ha laboratory test. An nagpositibo la amo an taga Leyte, Leyte nga iginkahampang hin tagay han iya igkasi driver hin van nga nagmaneho han ginsakyan han Naval Patient.
Ha kabug-usan, 72 na katawo an natapnan han virus ha Eastern Visayas ngan tobtob yana, ngatanan mild cases an nahitabo. Tobtob kanina han aga, 34 na an naka-recover han sakit, dugang pa han DOH.
An Eastern Visayas Regional Covid Testing Center in nakag proseso na hin 2674 swab samples tikang han pag-abri han operasyon hini hadton Mayo 11 ngan waray backlog.
Utro nanawagan an ahensya ha publiko nga hingpit gud nga magsunod han minimum health standards nga ginlalakipan han insakto nga pagsul-ot han face mask kun magawas han balay, pagmintenar han porlomenos usa ka metro nga physical distancing ngan pirmi paghunaw hin maupay han kamot labi na kun tikang ha gawas han balay. # (KEVIN SIOSANA)
