(Photos by LGU-Basey Municipal Information Office)

Isumat.com/2:14PM, August 13, 2020

Igrerekomendar han DOH Regional Office ha Municipal Inter-Agency Task Force han Basey, Samar nga igpatuman an Hard Lockdown didto ha Brgy Villa Aurora tungod han dako nga peligro nga magsibrang pa an Covid-19 didto han nasabi nga lugar.

Dida han interview han 99.1 iFM-RMN Tacloban, iginpahayag ni DOH Regional Information Officer John Paul Roca nga angay na an duro ka istrikto nga Community Quarantine didto ha Villa Aurora. Ini an karuyag matabo han DOH kataliwan la nga umabot na ha 41 nga residente han barangay an nadarahigan han ginkakahdlukan nga kagaw.

Nag-asoy hi Roca nga basar han ira monitoring, an mga mulopyo didto in nakakagsudoy-sudoy ha gawas han ira balay ngan napakadto han iba nga parte han Villa Aurora. Pero ginklaro ni Roca nga deri napakadto ha iba nga barangay an mga taga Villa Aurora. Pira na ka adlaw an nakalabay, iginpa-ilarum na han LGU an Villa Aurora ha lockdown.

Kinahanglan nga deri na gud gumawas ha ira balay an ngatanan nga taga Villa Aurora kay hitaas an posibilidad nga damo pa an matatapnan han virus, sering pa ni Roca.

Kadungan hini, iginpasarig naman ni Roca an syento porsyento nga suporta han DOH kun ano man nga mga aksyon an hihimoon han LGU kasumpay han sitwasyon didto han barangay.

Hapagkayana, aada pa ha Local Transmission an kahimtang han Covid-19 ha Villa Aurora pero posible ini magin Community Transmission ha ano man nga oras, pahayag ni Roca. Kun umabot an takna nga deri na matutudlok an pagitapon-tapon, mahihimo na ini nga Community Transmission.

Ha bug-os nga rehiyon, didto pala ha Tarangnan, Samar an may natabo nga Community Transmission kun diin sobra 30 ka tawo an nag positibo han virus, pero ini nga sitwasyon in nagpapas na.

Gin-utro naman ni Roca an panawagan ha mga Basaynon labi na an taga Villa Aurora nga deri mag-panic ngan hingpit nga pagsundon an mga patakaran basi deri na maglarab pa an virus.

Hasta ngada yana, waray pa matudlok han mga otoridad han panlawas kun diin pagtikang ini nga virus nga nakatapon han mga nag-uukoy didto han mao nga barangay.

An LGU ha panguna ni Mayor Luz Ponferrada in nagpapadayon han panhatag hin ayuda ngan mga panginahanglan ngadto han apektado nga mga residente.

Umabot na hin 70 an nagpositibo han virus ha Basey ug an mga Active Cases amo ini nga 41 ha Villa Aurora. An iba in mga Locally Stranded Individuals. #