Isumat.com/8:15AM, August 03, 2020
Kumpirmado nga may natatabo nga Local Transmission han COVID-19 ha Palo, Leyte sumala kan Mayor Ann Petilla.
Dida han opisyal nga pahayag ni Petilla yana nga aga, iya ginkumpirmar nga Local Transmission an hinungdan han katapni han 29-anyos nga lalaki nga taga Brgy Sta Cruz. Hiya in anak han 61-anyos nga lalaki nga naha-una nga nagpositibo.
Waray travel history an bug-os nga pamilya ngan waray liwat hira igka-urusa hin mga Locally Stranded Individuals o nagka-abot nga OFW. Hapagkayana, an tatay in naka-confine ha Leyte Provincial Hospital. Ginpa-swab test hiya kay nagpakita hin sintomas han corona virus. An iya anak nga natapnan in aadto na yana ha Isolation Facility han LGU. Padayon naman nga gindudumara han LGU an contact tracing han mga indibiduwal nga iginka-urusa han mga miembro han pamilya.
Kasumpay hini, hi Petilla in nanawagan ha iya mga nasasakupan nga tim-os gud pagsundon an mga health protocols labi na yana nga mayda local transmission dida han bungto. 32 na an nagpositibo ha Palo ngan 19 an naka-recover.
Ini nga bag-o nga kaso han COVID ha Palo in lakip dida han siyam nga bag-o nga natapnan denhi ha Region 8, kun diin tulo an taga Palo.
Ha luyo nga bahin, usa nga pulis an lakip han bag-o nga mga nagpositibo han kagaw. Sumala han pahayag han LGU-Alangalang, an 38-anyos nga lalaki in usa nga Uniformed Personnel han Regional Office ha Campetic. An katapusan nga iya pag-uli ha Alangalang in hadton hulyo 22. Naghihimo gihapon hin contact tracing an LGU kasumpay hini nga kaso.
An iba nga mga nagkatatapnan in tikang ha Baybay City, Palompon, Barugo ngan Abuyog. Hira in ngatanan mga LSI.
Umabot na ha 982 an nagpositibo han virus ha Eastern Visayas ngan 670 an naka-recover (71%). #
