Isumat.com/8:21AM, August 02, 2020
Mayda na liwat bag-o nga kaso han COVID-19 ha Eastern Visayas nga waray pa kasasabti kun hin-o o diin hiya katapni han virus. Ini nga lalaki in lakip han 37 nga bag-o nga Positive Cases han rehiyon nga iginreport kakulop (Agosto 1) han DOH Regional Office.
An 82-anyos nga lalaki in taga Carigara, Leyte. Nagsumat an LGU nga waray hiya travel history sanglit nagdudumara yana hin mahugot nga contact tracing an mga otoridad han panlawas dida han bungto. Iginpa-ilarum hiya hin swab test samtang naka-confine ha Divine Word Hospital. Pag gawas han resulta kakulop nga positibo hiya han virus, iginbalhin hiya ha EVRMC . An ikaduha nga bag-o nga kaso ha Carigara in usa nga LSI tikang ha Paranaque.
An bungto han Hilongos an nag-antos han gidadamu-o nga bag-o nga kaso tungod kay walo nga residente han bungto an natapnan. An unom ha ira in mga LSI tikang ha Luzon samtang an duha in mga OFW tikang ha Saudi Arabia.
Lima naman nga pasyente an nahipatik ha Villaba, Leyte kun diin an upat in tikang ha Cebu ug an usa tikang ha Muntinlupa. Ha luyo nga bahin, unom naman an nahi-record nga natapnan ha Baybay City ngan mga LSI gihapon hira.
Tulo an bag-o nga kaso ha Abuyog samtang tag-duha naman ha Mayorga, Palo ngan Isabel. Ngatanan gihapon ini mga LSI.
Tag-urusa naman an mga natapnan ha Julita, Tolosa, Matag-ob, Merida, Calubian ngan Tanauan. Lima ha ira an LSI ug an OFW taga Matag-ob.
Ha kabug-usan, umabot na 936 an COVID Cases ha Eastern Visayas ngan 670 (71%) an naka-recover. Mayda naman 263 nga Active Cases hapagkayana.
Samtang, iginpa-ilarum naman hin 74-oras nga Hard Lockdown an Brgy Maslog ha Lawwan, Eastern Samar tinikangan kakulop. Ini in agud makaghimo hin hingpit nga contact tracing basi matudlok an mga iginka-urusa han babaye nga residente han barangay nga nagpositibo hadton Hulyo 31.
Manunumduman nga ini nga pasyente in umabot han lugar tikang ha gawas han Pilipinas hadto pa han Marso. Nagpa-swab test la hiya hadton Hulyo 29 kay rekisitos man an resulta basi makabiyahe hiya tipagawas han Pilipinas ngan positibo an resulta. #
