Isumat.com/Pebrero 1, 2023
Hi Valenzuela City Congressman Rex Gatchalian an bag-o nga magrerenda han pamunuan han Department of Social Welfare and Development (DSWD).
Ini in katapos la hiya matudlok ha mao nga pwesto ni Presidente Bongbong Marcos Jr. kakulop, Enero 31, 2023. Hi Gatchalian in nanumpa ha iya pwesto didto ha Malakanyang.
Tungod han iya ba-o nga pwesto, iya babayaan an pagigin tinaglawas ha kongreso han Valenzuela City ngan magtutudlok an kongreso hin “caretaker” nga congressman nga manginginano han nasabi nga distrito.
Hi Rex in bugto ni Senador Win Gathalian ngan anay Valenzuela Mayor Wes gathalian. Antis nagin congressman hi Rex, hiya in nagin Vice-Mayor ngan Mayor han Valenzuela.
Hiya in usa han mga anak han bilyonaryo nga negosyante William Gatchalian nga amo an founder han Wellex Group of Companies nga naglalakip han Wellex Industries, Waterfront Philippines ngan Air Philippines.
Nagsering in pira nga senador nga angayan hi Gatchalian nga DSWD Secretary kay an iya gintutukan komo hadto alkalde han Valenzuela amo an social services ngan disaster response and management.
Mayda liwat mga tag-obserbar in nagpabati nga estratehiya ini han pamilya Gatchalian ha pulitika. Komo DSWD Secretary, haluag an exposure ni Rex ha publiko ngan media, sanglit puede ini magin dalan pagkandidato ka senador hit 2025 elections ngan magigin duha na hira nga Gatchalian ha senado, sugad han istilo han magtala-iroy nga hira Cynthia ngan Mark Villar, ngan magbugto nga hira Allan Peter ug Pia Cayetano.
Kun manunumduman, hi Erwin Tulfo in waray makalusot ha Commission on Appointments sanglit waray hiya magin permanente nga DSWD Secretary ngan boluntaryo nga ginbayaan an posisyon. #
