Isumat.com/5:31PM, October 6, 2020
Iginmando han Court of Appeals (CA) ha mga security officials han gobyerno nga magpakita han mga rason kun kay-ano nahilakip hi Congressman Vicente Veloso han binansagan nga “Narcolist.”
Kun manunumduman, hi Veloso nga amo an tinaglawas han 3rd District han Leyte ha kongreso, in nagsampa hin petisyon ha CA basi manduan an gobyerno nga tanggalon an iya ngaran dida han listahan han mga dagko nga personalidad nga nahidadabi han iligal nga droga.
Dida han Marso 2019, hi Presidente Duterte in nagpagawas han “narcolist” han mga pulitiko nga nadadabi han iligal nga binuhatan ngan upod dida hi Veloso. Tungod hini, an DILG in nagpasaka hin kaso administratibo ha Ombudsman kontra kan Veloso.
Sumala han report han Rappler, na-obserbaran han CA nga dida han reklamo nga ginsampa ha Omubudsman, waray igdetalye han DILG an mga ebidensya kontra han congresista. Nagpahayag an CA waray dida han dokumento an natirok nga mga ebidensya kontra kan Veloso ngan an reklamo in nahipapatik la hin usa ka “paragraph”.
An Security Cluster han gobyerno (DILG, PNP, AFP, PDEA, NICA) in nagdig-on nga deri nira puede igpagawas an mga ebidensya ha korte kay mamimilegro an seguridad han nasud.
Nagpahayag an CA nga deri ini puede kay mismo an Korte Suprema in nagpahayag na nga kinahanglan magpagawas gud hin mga ebidensya. Kun hihimoon la nga rason an “national security” ha parehas nga mga kaso, mababaliwaray an insakto nga proseso han pagpatuman han balaud.
Nag-esplikar pa an CA nga ginkikilala nira an poder han Presidente nga mag-imbestigar hin mga krimen ngan pagtudlok han tinatawag nga “Privileged information.” Pero kinahanglan balansehon an pagpasunod han balaud kay an kada tawo nga gin-aakusaran in mayda katungod pagdepensa han iya kalugaringon ngan makasabot kun ano an ginpatamakan han akusasyon kontra ha iya, pahayag pa han CA.
Ini n pagpakita nga nahipapatuman an “transparency” ha pagpasunod han balaud ngan ini in importante hin duro ha demokrasya nga sosyedad, dugang pa han Court of Appeals.
Ini nga kamanduan in nahipatik ha 42-ka pahina nga desisyon iginpagawas Uktubre 5 ngan pirmado nira Justices Apolinario Bruselas, Germando Legaspi ngan Ruben Roxas. #
