Isumat.com/8:15AM, Abril 22, 2021
Nadakop han mga kapulisan in usa nga kagawad hin barangay ug an iya kaupod han maaktuhan hira nga iginbibiyahe an iligal nga pinanngutod nga kahoy kanina han maagahon ha Brgy Bugko, Mondragon, N. Samar.
An mga suspetsado in ginkilala nga hira Damian Ponelas, 47 anyos, inasaw-an, kagawad han Brgy Roxas, Mondragon; ug an iya kabarangay nga hi Norie Teblaso, 42 anyos nga mangirisda.
Iginreport han mga otoridad nga an duha nga suspetsado in nasikop samtang ira iginbibiyahe sakay hin motorsiklo in 18 ka pidaso hin kahoy nga Lawaan nga may sukol nga 119 ka boardfeet . Dida han pagsitar han kapulisan, waray nahipakita nga mga dokumento an mga suspetsado kasumpay han ira dara nga kahoy.
Tungod hini, gin-aresto an mga gintatahapan ngan gindara upod an mga ebidensya ha Mondragon PNP station para han kaangayan nga disposisyon.
An nagdumara han operasyon amo an mga kaapi han Mondragon PNP ngan Northern Samar Police Special Operations Group. Natabo an operasyon alas 12:45 han maagahon, Abril 22.
Ha iba naman nga notisya, usa nga kaapi han kumunista nga New Peoples Army an sumurender ha gobyerno didto ha Lope de Vega, Northern Samar.
An 36 anyos nga lalaki in nagtubyan gihapon hin usa nga AK-47 nga pusil ngadto ha 43rd IB Philippine Army nga nakabase didto han bungto. Hiya in nakatalaan ig turn-over ha Northern Samar Provincial Police Office.
Nagpahayag an rebelde nga bumalik hiya ha piyod han balaud basi makatagamtam han mga benefecio nga gin-o-opreser para han mga rebel returnees. #
