An nagrereklamo nga hi Jewel Zeta ug an iginrereklamo nga hi Brgy Kapitan Alexander Bentulan. (Photo by Raffy Tulfo in Action/ABC 5)

Isumat.com/8:38AM, Abril 22, 2021

Nahimo na yana nga sentro hin iristorya ngan sumsuman ha social media an insidente ha Tacloban City kun diin nag-reklamo in usa nga babaye kontra hin usa nga kapitan del barangay kay ginpirit daw an babaye hin pakighilawas kabalyo han utang nga kwarta.

Nag viral na ha internet ngan facebook an panhitabo tungod kay ginpasalida ini ha telebisyon pinaagi han programa ni Raffy Tulfo kun diin igindanghala han babaye an iya problema.

An tagreklamo in ginkilala nga hi Jewel Zeta, aada ha igo nga pangidaron, single mother ngan residente han Brgy 50-A Youngfield District. An iginrereklamo amo hi Alexander Bentulan, kapitan han mao nga barangay. An kantidad han utang nga nagin ugat hini nga isyu in porlomenos 2 Mil pesos.

Dida han pamaki-ana ni Tulfo, iginbuyagyag gihapon ni Zeta nga tungod han ira sex ni Bentulan, nagburod ngan nanganak hiya ug usa na ka bulan yana an baby. Pero hi kapitan in mahugot nga nagdiwara nga hiya an amay han baby.

Dida han interview ni Tulfo, nalutaw nga hi Zeta in naka-utang kan Bentulan ngan na-utro na liwat pag-utang an babaye kan kapitan. Aminado an duha nga natabo ini nga pangutang. Nagsering hi kapitan nga han ikaduha nga pagmogo hin utang ni Zeta, iya gin-intremisan an babaye nga bangin deri ka na makabayad ngan ikaw na lugod it magin bayad han utang. Sumala kan Kap, binaton daw hi Zeta nga “waray man problema, Kap.”

Dara hini, nag-upod hira ngadto hin usa nga hotel. Igindig-on ni Zeta nga waray hira pagsabot nga masulod hin hotel ngan magse-sex basi makabayad han utang, ngan waray na hiya nahimo kay mas makusog an lalaki ha iya sanglit natabo an ira paghilawas.

Pero, sering ni Kap, mayda “consent” hi Jewel han natabo ha ira ngan waray niya ini pagpirita. Tungod kay nagburod ngan nanganak hi Jewel, gusto niya maghatag hin financial support para han bata hi kapitan. Waray susugot hi Kap kay deri daw hiya an amay, labi na nga mayda kuno iba nga lalaki nga ginkaka-upod-upod hi Zeta. Igin-alegar pa ni Kap nga mayda mga lalaki nga “na pick-up” kan Jewel. Ini in mahugot liwat nga pinanhimuwa ni Jewel.

Hi Tulfo an nagsering nga hiya an mabayad han DNA Test para han baby ngan kan kapitan basi mapamatud-an kun hi Bentulan man gud an amay. Nagsering hi Kap nga kun mapamatud-an ini, iya susuportaran an bata.

Iginsumat pa ni Jewel nga nagkadto na hiya ha Womens Desk pero mayda mga personales didto an nagsagdon ha iya nga deri nala magpa-DNA kay nama-magic an resulta hito. Pero na-insister gud hi Jewel nga kinahanglan an DNA Test basi masolosyunan na ini nga isyu.

Ini yana nga istoryahon in alagid-agid hin teleserye ha telebisyon kay labot la han mga Taclobanon, ginbabantayan ini hin kadam-an nga mga Pilipino, ngan maaram naman kita nga kadam-an nga Pinoy an mahilig han istorya han kinabuhi hin iba nga tawo. Sering pa man, an sugad hini nga panhitabo in usa nga negosyo ngan li-aw libang han katawhan ha Pilipinas. #