Mag-aarasdangay an mga banggi-itan nga mga baseball players ha bug-os nga Visayas dida han ti-arabot nga 2023 Little League Philippines Series Visayas Regional Championship, Pebrero 5-11, 2023 ha Pambujan, Northern Samar.
Pito nga dibisyon han torneo an papartisiparan han magkalainlain nga de-kalibre nga mga teams tikang ha Western Visayas, Central Visayas ngan Eastern Visayas. An mga tournament organizers in nagpahayag nga segurado magigin mapaso an gyera ha butnga han mao nga mga grupo labi na nga an iba hini in mga beterano na ha international tournaments.
Mismo an host town han Pambujan in kumpiyansado nga mahatag hira hin makusog nga laban kontra han mga dayo han iba nga lugar. An Pambujan Nalucaban Kids amo an iginpaparayaw han bungto nga amo an magdadara han ira bandera.
Sumala kan Coach Mon Espina, tikang pa han dekada 70 nga nagin makusog nga pwersa ha baseball an Pambujan ngan kadam-an na han ira mga players in naka-api han Philippine Team ngan nagdara hin damo na nga mga titulo para han nasud.
Pira ka beses nga nagin kampeon an Nalucaban Kids ha National League Baseball Championships, nagin champion ha Palarong Pambansa, ngan naghadi-hadi ha EVRAA baseball tikang 1975-1985.
Yana, damo gihapon an taga Pambujan nga mga kaapi han baseball varsity han mga kilalado nga unibersidad ha Pilipinas kun diin hira in mga scholars.
Kasumpay hini, an munisipalidad ha panguna ni Mayor Eping Sosing in ginbuhat an ngatanan nga preparasyon basi maseguro nga magigin hapsay ngan marisyo an torneo.
Ginbabanabana maabot hin 300 nga mga players ngan coaches tikang han tulo nga rehiyon an magkakatitirok ngan maglalantugi dida hini nga kompetisyon.
Iginpatapod han LGU nga magigin maupay nga hinumduman para han mga delegado an ira pagpakadto ngan temporaryo nga pag-istar ha Pambujan.
An magigin kampeon ngan 2nd placer ha kada dibisyon amo an magtataglawas han Visayas dida han National Finals igintalaan hiton Abril 2023 Ilagan City, Isabela.
Kadungan han Visayas Regionals ha Pambujan, paghihimoon gihapon hit Pebrero an mga Regional Finals ha Northern Luzon, Southern Luzon – NCR, ngan Mindanao.
Naningkamot an LGU-Pambujan nga hira an magin venue han 2023 Regional Visayas Finals basi nira mahipasundayag an ira tim-os nga paghigugma han baseball ngan igpahinumdon ha ngatanan nga nagpapabilin nga mabakod an pag-uswag han baseball ha ira bungto.#
