Isumat.com/7:27AM, Abril 15, 2021
Ginlalauman nga mapapakurukusog pagdukwag an edukasyon han out-of-school youth ha Sinirangan Bisayas pinaagi han pagtukod han Girls Education Center (GEC).
An nasabi nga facilidad in titindugon ha compound han Deped Regional Office 8 ha Candahug, Palo, Leyte ngan ginbabanabana matatapos yana nga tuig. Panuyo hini nga proyekto an pagpa-uswag han kina-adman han mga out-of-school nga kabataan labi na an kababayen-an nga nag-aaram ha ilarum han Alternative Learning System (ALS).
An GEC in paglalakipan hin library, life-skills training room, exhibition gallery, wellness room, ngan mga laboratoryo ha pan-kusina, ICT, Mathematics ngan Science.
Panguna nga makakatagamtam hini nga proyekto an mga estudyante ha Tacloban, Palo ngan paghagrani nga munisipalidad.
Ini nga facilidad amo an gisasyahani ha bug-os nga Pilipinas ngan ini in ginpondohan hin 1 Million US Dollars tikang ha Korean International Cooperation Agency (KOICA) ug an mag-iimplementar amo an UNESCO ngan DepEd. An GEC in kaparte han mga hinabang ha Region 8 tikang ha International Community tungod na gihapon han danyos han Bagyo Yolanda.
Gindumara kakulop, Abril 14, an groundbreaking ceremonies han proyekto ngan gin-atenderan ini nira UNESCO Jakarta National Project Officer Remegio Alquitran, Leyte Governor Mic Petilla, DepED Regional Director Gemma Ledesma ngan kadam-an nga mga opisyales. #
