Isumat.com/8:57AM, August 28, 2020
Nagpasarig an Samar PNP Provincial Office nga deri nira papasibay-an an pagmintenar han kamurayawan ha bug-os nga lalawigan bisan kun nasasagipo hira han mga aktibidadis tungod han pagsarang han Covid-19.
Hi Col Andre Dizon, nangungulo han Samar PNP, an nagpahayag nga an mga pwersa han kapulisan sugad man an mga tropa han 8th Infantry Division-Philippine Army an mahugot an pag-gwardya kontra han bisan ano nga plano pagsamok han mga rebelde nga kaapi han New Peoples Army.
An mga Intelligence Units han PNP ngan Philippine Army in waray hunong an paghikay hin mga impormasyon kasumpay han mga plano han mga rebelde basi kabalabgan an bisan ano nga pag-atake, sering pa ni Dizon.
Kasumpay hini, ginsukna han opisyal an mga rebelde nga kumunista tungod han ira pagsingabot hin pantarhog ngan pagsamok ha atubangan han kakuri-an nga gin-aantos yana han katawhan tungod han pandemya.
Hi Dizon in nagpahayag pa nga mas gin-istriktohan yana han kapulisan an pagpasunod han mga patakaran tungod han nagtitikahitaas nga kaso han Covid didto ha Samar. An probinsya an gidadamu-i yana an kaso han virus ha bug-os nga Eastern Visayas. Dida han report han DOH, an mga kaso han Covid ha Samar in umabot na ha 952.
Nakasentro yana an kapulisan ha pagbantay han publiko ha Catbalogan City kun diin natatabo na an Community Transmission han virus ngan 370 na an natapnan dida han syudad. Iginpa-ilarum na an Catbalogan ha Enhanced Community Quarantine.
Yana naman nga adlaw, Agosto 28, igbabalik an GCQ ha bug-os nga rehiyon. Hinungdan hini, nagsering hi Dizon nga magigin darudako pa an obligasyon han kapulisan ha pagdisiplina han publiko, pero iya iginpatapod nga deri hira matukal pagbantay kontra han mga rebelde. #
