Isumat.com/7:54AM, August 28, 2020
Kun pagbubuhaton yana nga mga panahon an pinili-ay pagka-senador, dako an tsansa nga malalakip han magdadaog hi Leyte 4th District Congresswoman Lucy Torre-Gomez.
Ini in subay han survey nga gindumara han Publicus Asia Inc. yana nga bulan han Agosto. Dida han nasabi nga survey, ginpaki-anhan an ginatos-gatos nga mga respondents ha bug-os nga nasud kun hira hin-o nga mga personalidad an ira bobotosan pagkasenador dida hiton 2022 National and Local Elections.
Hi Gomez an nag-ikapito dida han survey kun diin an iya na-angkon nga grado in 28.5%. Ini nga resulta han survey an iginpagawas gihapon ha Official Website han syudad han Ormoc kun diin residente an congresista ug alkalde an iya bana nga hi Richard Gomez.
Nanguna dida han survey hi anay senador ngan yana Sorsogon Governor Chiz Escudero-53.7%, ngan ginsundan nira Senador Manny Pacquiao-46.5, Doc Willie Ong-41, Sarah Duterte-36, Migz Zubiri-34.5, Bongbong Marcos-34, ug ikapito hi Gomez.
Nag-ikawalo naman hi House Speaker Alan Peter Cayetano, ika-siyam hi Senador Win Gatchalian, ika-napulo hi Cong Paulo Duterte, ika-11 hi Bam Aquino ngan ika-12 hi Joel Villanueva. Na-okupar naman tikang ika-13 tobtob ika-20 nga pwesto hira Dick Gordon, Riza Hontiveros, Loren Legarda, Chel Diokno, Angel Locsin, Mike Defensor, Kiko Pangilinan ngan Serge Osmena.
Hi CongW. Lucy in aada na yana han iya ika-tulo ngan katapusan nga termino komo representante han ika-upat nga distrito han Leyte. Ha atubangan hini nga resulta han survey, waray pa magpapahayag hi Torres-Gomez kun ano an iya plano ha pulitika pag-abot han 2022.
May mga sumat-sumat nga hi Richard Gomez in madalagan ka kongresista samtang hi Lucy in makandidato ka-mayor han Ormoc. Mayda liwat hurob-hurob nga posible pagka-senador an dalaganan ni Lucy ngan congresista hi Richard ug pagka-mayor han Ormoc hi Vice-Mayor Toto Locsin. Pero may mga sektor an nagsusumat nga deri la anay makandidato hi Lucy ha bisan ano nga posisyon samtang hi Richard in makandidato utro ka alkalde para han iya ikatulo nga termino.
An mga kritiko han Torres-Gomez nga kampo in nagsesering naman nga naghihimo hira hin political dynasty ha 4th District han Leyte kay an manghod nga bugto ni Lucy ngahi Matt Torres amo an alkalde han Kananga, samtang an mister han bugto ni Lucy, hi Vince Rama in konsehal yana ha Ormoc.
An Leyte 4th District in ginkokomponer han Ormoc City ug mga bungto han Albuera, Kananga, Isabel, Matag-ob, Merida ngan Palompon.
An nagdumara han survey nga Publicos Asia Inc in usa nga kompaniya nga namumutang ha Ortigas Center, Pasig City. Dida han ira website, an kompaniya in nahimugso hadton 2003 ug an ira mga kliyente in naglalakip hin kilalado nga mga negosyante, pulitiko, organisasyon, mga LGUs, sugad man National Government ngan iba nga nasud. #
