Isumat.com/9:32AM, August 27, 2020
Mabidoon nga ginkarawat han pamilya ug mga Giporlosanon an patay nga lawas ni Pvt John Rey Paller, kaapi han Philippine Army nga namatay dida han makangingirhat nga pamomba ha Jolo, Sulu hadton Lunes.
Iginpahayag han 8th Infantry Division Civil Military Unit nga nakadangat an patay nga lawas ni Paller ha ira panimalay ha Brgy Parina, Giporlos han maagahon hadton Martes, Agosto 26.
An 23-anyos nga sundalo in usa han mga biktima han duha nga insidente han pamomba ha Jolo. 15 katawo an namatay dida han magkasunod nga pagbuto ug an mga biktima in ginlalakipan hin mga sundalo, pulis ngan sibilyan.
An syahan nga pagbuto in natabo harani han merkado kun diin nanmamalit an mga kasundaluhan, samtang an ikaduha nga bomba in binuto harani han estasyon han pulis. Nagpahayag an mga otoridad nga mga suicide bombers an naghimo hini nga pamomba. An terorista nga grupo ISIS an nag-angkon nga hira an may binuhatan han nasabi nga pamomba.
An Probinsya han Eastern Samar ha panguna ni Gobernador Ben Evardone ug an LGU-Giporlos ha pamuno ni Mayor Gilbert Go an mahugot nga nagkondenar han brutal nga panhitabo kadungan han ira pagpahayag hin kabido ngan pagpa-abot hin simpatiya ngadto han pamilya ni Paller. #
