Isumat.com/10:30AM,July 24, 2020
Porlomenos 800 nga Locally Stranded Individuals (LSI) an nakatalaan nga maabot ha Eastern Visayas dida hiton Hulyo 26 ngan Hulyo 27, 2020. Sumala han Presidental Management Staff (PMS), ini nga pagbiyahe han mga LSI in pinaagi han Hatid-Tulong Program han gobyerno.
Hapagkayana, 776 na an kumpirmado nga magkakabalik pero posible lumapos pa ini hin 800 kay tobtob pa buwas, Hulyo 25, an pagpalista.
An ginatos-gatos nga LSI in magkakalakat ha Manila dida hiton Sabado ngan Domingo ngan maabot ha Region 8 katapos hin usa ka adlaw nga byahe. Masakay hira han mga public utility buses nga gin-arkila han gobyerno.
Dara hini, nahingoroso-os yana an pangandaman han Regional COVID Task Force, DOH Regional Office ngan mga LGUs han rehiyon kay ini an gidadamu-i nga magkaka-abot nga LSI nganhi ha Eastern Visayas tikang bumutho an ginkakahadlukan nga kagaw.
An mga LSI in tatagan hin tag Dos Mil pesos ngan pagkaon han DSWD dida han ira paglakat, samtang an Bureau of Fisheries and Aquatic Resources an magpapakaon ha ira pag-abot.
An Hatid Tulong Program in proyekto han Office of the President upod na gihapon hi Executive Secretary Salvador Medialdea, ngan PMS Asst Secretary Joseph Encabo.
An kada probinsya in nagtudlok na hin lugar kun diin magkakahaw-as an ira mga LSI ngan tikang didto kukuha-on hira han mga behikulo han tagsatagsa nga LGU basi igderetso ha mga Quarantine Areas.
Nahisumat naman nga waray LSI nga maabot ha Biliran tungod kay gin-aprobaran han National Agency Task Force an hangyo ni Governor Rogelio nga deri la anay hira makarawat hin LSI tobtob Hulyo 31.
Hi Eastern Samar Governor Ben Evardone in nag-request gihapon nga deri la anay makarawat an iya probinsya hin LSI tinikangan hiton Hulyo 27 kay limitado an kapasidad han mga Quarantine ngan Isolation Facilities ha ira mga LGUs. Tobtob han ginsusurat ini nga notisya, waray pa desisyon an National IATF kun tatangdu-an an hangyo han gobernador. 173 nga LSI an nakatalaan unta nga maabot ha Eastern Samar hito nga petsa.
Dida han sobra 700 ka tawo nga natapnan han COVID-19 ha Eastern Visayas, 70 porsyento an mga LSI. #
