Isumat.com/4:15PM, July 21, 2020
Ginlalauman nga magtitikaribhong na an negosyo han mga restaurant ngan mga carenderia ha damo nga lugar denhi ha Rehiyon Otso.
Ini in tungod kay tinikangan yana nga adlaw, Hulyo 21, 2020 , ini nga mga establisemento ha mga lugar nga aada ha Modified General Community Quarantine (MGCQ) in puede na maka-akomodar hin 75 porsyento han kapasidad para han mga kostumer.
Subay han Memorandum Circular 20-39 han Department of Trade and Industry (DTI), an mga restaurant, carenderia ngan paruparehas nga mga negosyo in puede na magserbe hin 75 % ha MGCQ ngan 50% ha mga lugar han GCQ tinikangan Hulyo 21.
Ini nga pagtugot in para han dine-in o manganga-on ha sulod han establismento.
Tungod hini, ginbabanabana nga magtitikadamo na an mga parokyano ha mga restaurant labi na ha Tacloban, Biliran, Northern Samar, ngan Eastern Samar nga iginpa-ilarum na ha MGCQ.
Nagsering an DTI nga ini nga pitad in agud mapadarudagmit an pantindog han naharusdak nga negosyo hini nga sektor durot han COVID-19.
Gintutugutan na gihapon an pagpahilawig han operasyon hini nga mga establisemento tobtob han alas 12 han kagab-ihon.
Pero ginklaro han DTI nga kinahanglan istrikto nga igpatuman han mga negosyo nga sugad hini an minimum health standards nga iginplastar han Department of Health. #
