Isumat.com/12:15PM, September 7, 2020
Porlomenos 700 Mil pesos an kantidad han naugbaw nga mga propyedadis han natabo nga sunog kagab-i ha Brgy 62, Sagkahan, Tacloban City.
Subay han inisyal nga imbestigasyon han BFP-Tacloban, unom nga kabablayan nga hinimo-an hin light materials an ginkaon han kalayo. Waray naman nahisumat nga nag-antos hin karamtan ha lawas dida han panhitabo. Igindugang pa han mga imbestigador nga an rason han kalayo in waray pa katutudlok hasta ngada yana, pero may mga testigos an nagpahayag nga mayda nagtoto-on nga nakalimot han kalayo ha kusina.
Nagsumat an BFP nga alas 8:07 han gab-i han makakarawat hira han impormasyon nga may nasusunog didto han lugar. Kadagmitan nga ginpalakat nira an syahan nga firetruck basi magresponde, pero waray ini makadangat ngadto han sunog kay iginkabangaay hin firetruck han Chinese Chamber Fire Volunteer.
Hinungdan hini, nagpadara hin ikaduha nga grupo an BFP ngadto han lugar han sunog nga amo na an nakagdeklarar han fireout pasado alas 8:50. Antis umabot an mga bumbero, an mga residente han lugar an nagburublig pagkontrol han kalayo pinaagi han pag-alog ha mga bobon ngan bomba.
Nag-antos hin mga minor injuries an pito nga personales han BFP-Tacloban tungod han bunggo-ay, samtang pito gihapon nga fire volunteers an naka-angkon hin karamtan ug an drayber han behikulo an nasamaran ha ulo.
Gin-iimbestigar han mga otoridad an rason han pagsampakay han duha nga firetrucks ha eskina han Avenida Veteranos ngan Paterno nga mga kalsada. #
