Isumat.com/1:29PM, September 14, 2020
Nadakop han mga tropa han gobyerno in menor de edad nga rebelde ug an iya duha nga kaupdanan ha kumunista nga kagi-usan han nahitabo nga enkwentro kakulop, Setyembre 13, ha Sitio Kawayan, Brgy Rizal, Kananga Leyte.
An mga kaapi han 93rd Infantry Battalion in nakakarawat hin impormasyon tikang hin pira nga mga residente mahitungod han aktibidad han mga rebelde nga ginpapangunahan Juanito Selleza alas Tibor. An grupo han mga rebelde in nagdumara hin miting ha mga baryuhanon upod na an mga kabataan dida han sitio.
Pakakita han mga rebelde nga nagkaka-abot an kasundaluhan, nagpa-arak dayon hin bala an mga NPA ngadto han mga tropa han gobyerno. Waray la anay bumulos pagpabuto an mga army tungod han mga sibilyan nga ginhimo nga taming o sagang han mga rebelde samtang na-atras hira.
Han maka-tiempo na an militar, amo pala an ira pagpabuto. Samtang nag-iinatrason an mga rebelde, pira nga kabataan an ira ginhihimo nga sagang.
Dida han paplanat, nadakop han mga sundalo an tulo nga kaapi han rebelde nga grupo, upod na an 14-anyos nga daragita. Nakumpiskar tikang han mga rebelde in usa nga kalibre .45, mga bala, ngan mga ID Cards han Anak Pawis Party List ngan Tabang Sinirangan Bisayas. Nakuha gihapon in subersibo nga mga papeles ngan personal nga mga higamit han mga rebelde.
Usa nga sundalo an nasamad ngan kadagmitan gindara ha hospital basi pagtambalon.
An nasabi nga panhitabo in mahugot nga ginkondenar ni BGeneral Zosimo Oliveros han 802nd Infantry Brigade tungod han pagsalikway han mga rebelde han katalwasan han kabataan. Sumala kan Oliveros, ini nga gi-os han mga kumunista in pagtraydor kay bisan an kinabuhi han mga kabataan an deri nira gintatagan hin importansya. #
