Isumat.com/8:03AM, August 14, 2020

Mahugot nga iginmando ni Mayor Alfred Romualdez an istrikto nga pag-implementar han curfew ha Tacloban City basi deri na magkinalakat an mga menor de edad nga nakakagpahitaas han peligro nga magsarang pa an Covid-19.

Kadungan hini amo gihapon an pagpabalik han hingpit nga inspection han mga dokumento nga dara han mga tawo nga masulod ha Tacloban.

Sering ni Romualdez, kinahanglan waray na menor de edad (18-anyos tipa-ubos) nga magsusudoy-sudoy ha gawas han balay paglapos han alas 10 han gab-i. Ginmanduan gihapon han alkalde an mga establisemento nga deri pasudlon an mga menor de edad kun umabot na ini nga oras.

An mga personales han TOMECO ug an Tacloban City PNP in maghihimo hin operasyon kada gab-i basi pandakpon ngan isyuhan hin citation ticket kun diin magmumulta an makakasupak nga kabataan.

Na-obserbaran nga tikang igbutang ha Modified General Community Quarantine an Tacloban, damo nga mga menor de edad an makikt-an ha gawas ngan damo liwat an nagkaka-aagahan ha mga bars ngan irignuman.

Ha luyo nga bahin, kinahanglan mayda medical certificate, travel authority ngan valid ID card an hin-o man nga masulod ha Tacloban tikang ha iba nga parte han Eastern Visayas.

Ini nga aksyon ni Romualdez in nahimugso tungod han nanhitabo nga mga nagpositibo han virus ha Tacloban nga deri nasasabtan kun hin-o an nakatapon ngan diin katapni. #