Isumat.com/7:24AM, August 14, 2020

Tungod han ura-ura nga pangabugho, waray makontrol ni mister an iya emosyon ngan gin-ikaparatay an iya misis ug naglugaring liwat hiya pagtiwas han iya kinabuhi.

Ini in subay han inisyal nga imbestigasyon han Ormoc City PNP kasumpay han panhitabo ha Brgy Liloan didto han nasabi nga syudad kun diin an namatay nga suspetsado in ginkilala nga hi Dominador Doria, samtang nag-antos naman hin igo hin bala an iya ginang-maybahay nga hi Jocelyn, 39 anyos ngan usa nga OFW.

Iginpahayag han mga imbestigador nga hadin nakalabay nga adlaw, nagin mapaso an pagkabalingkutay han magti-ayon dara han pagtahap ni mister nga mayda lalaki nga iba an iya asawa. Tungod han duro na nga pangabugho ngan kahangit, ginkuha han suspetsado an iya ginhihinipos nga pistola ngan duha ka beses nga pinusil an iya asawa.

Katapos pusilon an iya misis, nagdesisyon hi Dominador nga magpakamatay ngan ginlugaringan pagpusil an iya kalugaringon.

Kadagmitan gindara ha hospital an mag-asawa pero gindeklarar nga dead on arrival an suspetsado, samtang nakatalwas ha peligro an iya misis.

Nagpapadayon pa an imbestigasyon han kapulisan ngan tobtob yana waray pa igpahayag an kalibre han pistola nga gingamit han krimen ngan waray pa gihapon makumpirmar kun tinood an mga pagtahap han suspetsado. #