Isumat.com/8:01AM, August 25, 2020

An mga modelo han pagsunod han balaud amo lugod yana an sasampaan hin kaso kay hira an nakasupak han mga patakaran nga ginpapasunod yana nga may pandemya han Covid-19.

Subay han report han Ormoc News and Updates, upat nga Authorized Persons Outside Residence (APOR), an nakatalaan pasakaan hin kaso tungod kay waray magsunod han Health Protocols han syudad. Iginmalatumat nga an mga APOR in naka-kwarentina hin 14 ka adlaw tikang han ira pag-abot. Pero deri pa tapos an kwarentina, nagkagawas hira han Quarantine Facility ngan nagsudoy-sudoy ha pira nga parte han Ormoc.

Hapagkayana, waray pa pag ngarani an nasabi nga mga APOR ngan kun ano hira nga ahensya konektado.

Ha Ormoc pa gihapon nga notisya, 11 nga empleyado han City Government an ginsagdunan nga magpa-ilarum hin Home Isolation katapos la nira igka-urusa hin katawhan tikang ha Catbalogan.

Nagkaada hin “ShootFest” ha Camp Downes han Philippine Army ha Ormoc ngan mayda mga partisipante tikang ha Catbalogan. An Ormoc City Health Office in nagmando na nga deri puede makasulod han syudad an bisan hin-o tikang han mga lugar nga damo an kaso han Covid, pero nakalusot an mga Catbaloganon.

Sobra na hin 200 ka tawo an natapnan ha Catbalogan ngan kadam-an hini pinaagi han Local Transmission. #