(Photos by Erwin Refuerzo)

Isumat.com/!2:03PM, August 25, 2020

An anggulo han iligal nga droga an posible nga rason kun kay-ano ginpatay an magtala-amay kanina han pasado alas 7 han aga ha Brgy Sta Cruz, Palo, Leyte.

An mga biktima in ginkilala nga hira Pio Penaflor, sobra 50-anyos an edad ngan anay miembro han PNP; ug an iya anak nga hi Alphie, 35-anyos. Hira ngaduha in nag-uukoy ha Brgy Mag-aso, Jaro, Leyte.

Sumala kan Palo PNP Chief Major Joemen Collado, an mga biktima in humaw-as tikang han van nga ira ginsakyan dida han nasabi nga lugar. Samtang nagbabaktas na hira harani ha Palo Municipal Library, ginsapitan hira hin itom an kolor nga Ford Everest ug ginpa-uranan hira hin bala han mga suspetsado nga sakay han SUV.

Katumba han magtala-amay, humaw-as pa in tulo ka tawo tikang han SUV ngan utro ginpanmumusil an magtala-amay hinungdan han ira kamatayon.

Nakuha dida han lugar han krimen in kadam-an nga mga basiyo han bala hin M-14 ngan kalibre .45. An mga suspetsado in nagkasakay utro han SUV ngan nagpaharurot tikadto an dereksyon ha Tanauan.

Dida han panmaki-ana han Isumat.com hin pira nga katatapuran nga surok, an mga biktima in nahidabi na hadto hin iligal nga droga ngan nagkadadakop na. Pero nakagawas hira tungod han “Plea Bargaining” ngan pagsaad nga deri na mabalik ha iligal nga binuhatan.

Nagsumat pa an impormante han Isumat.com, bumalik ha iligal nga negosyo han droga an magtala-amay ngan mayda pa daw nira mga batos nga amo an nagpapasarang han droga ngan nagkokolekta han kuhida tikang han mga pushers. #