Isumat.com/6:50AM, July 24, 2020
Maabot an panahon nga waray na taripa an mga kabaraydan para han mga serbisyo ngan sakramento nga gindudumara han Singbahan Katoliko, sumala kan Fr. Chris Miitante, Communications Director han Archdiocese han Palo.
Ini an nagin kabatunan ni Militante han pamaki-anhan hiya han reaksyon han Singbahan kasumpay han pagpahinumdom han Vatican nga dapat waray na mga kabaraydan han mga sakramento sugad han kasal, bunyag ngan iba pa. Nagsering hiya nga hapagkayana, padayon an hiruhimangraw han liderato han Singbahan han mga pamaagi basi mawara na ini nga taripa.
Hapagkayana, padayon nga ginsusunod an tinatawag nga “arrancel” kun diin may mga taripa o presyo han kada serbisyo ha Singbahan.
Nagsering hi Militante nga padayon nga ginhihimo yana an kunsultasyon ha magkalainlain nga sector basi magkaada hin pagka-urusa kun pau-nan-o hihimoon ini.
Ginklaro pa ni Militante nga an “arrancel” in deri kabaraydan kundi usa ini nga pag-giya para han mga Katoliko ha pagtuman han ira pagsuporta han Singbahan. Iya gintagan hin duon nga an Singbahan in deri la ginkokomponer han mga obispo ngan kapadi-an, kundi ngatanan han Katoliko.
Hinungdan hini, an mga Katoliko in mayda obligasyon pagsuporta han Singbahan kay kaparte hira han Singbahan. Igindugang pa ni Militante nga an kada tagsa nga Katoliko in nakaka-agom man han mga facilidadis han Singbahan ug an supurta pinansyal nga ira ginhahatag in gingagamit pagpaka-upay han mga facilkidadis ngan iba pa nga proyekto.
Kun huhuna-hunaon, deri gad angay igkonsiderar ini nga kabaraydan, lugod ini in mga donasyon o pag-alay komo kaparte han pagtoo nga an katawhan in kaupod han Singbahan, sering pa ni Militante.
Hapagkayana, an Singbahan Katoliko in nasarig han mga donasyon, koleksyon ha mga misa, mga pledges, ug an arrancel system. #
