Isumat.com/4:45PM, June 22, 2020
Kun waray swab testing, deri angay umuli nganhi ha Region 8 an mga na-stranded didto hin iba nga lugar.
Ini an nagkaka-urusa nga suhestyon han mga gobernador han Eastern Visayas dida hin usa nga hiruhimangraw kun diin ira ginkahisgutan an mga paagi ngan proseso kun pau-nan-o magigin mas epektibo an mga pitad pagsupil han COVID-19.
Iginsuhestyon han mga gobernador nga antis pabalikon an mga Locally Stranded Individuals (LSI) dapat naka-swab test na hira ngan kun mahihimo mayda na resulta. Puede gihapon igpadara an ira swab samples nganhi ha EVRTC basi ma-proseso, sanglit pag-abot nira mayda na resulta ngan makaka-andam an mga Local Government Units.
Na-obserbaran han mga opisyal nga kasagaran han mga nagpopositibo han virus an mga LSI kay nakakabalik man hira nganhi bisan kun health certificate ngan travel authority la an iginpapakita.
Igindig-on han mga opisyal nga an mga LSI la nga negatibo an resulta han laboratory test an pababalikon ha Region 8, ngan kun nalangan an resulta, didto la anay ha Quarantine Unit antis umuli ha iya balay.
Usa gihapon han mga rekomendasyon amo an temporaryo nga pagpahunong han pagkabalik han mga LSI, OFWs, ngan beneficiario han Balik Probinsya Program. Kakulop, an DILG Task Force COVID Shield in nagmando han temporary suspension han pagbyahe han mga LSI tikang ha Cebu.
Na-aalarma gihapon an mga gobernador dara han impormasyon nga may mga LSI nga nakakalusot kay an ginpapakita nga mga papeles in gindoktor o peke labi na kun tikang ha Luzon. An Travel Authority in exclusibo la nga ighahatag han PNP ngan deri mga LGU.
Usa gihapon han na-obserbaran nga may mga LSI nga nakaka-uli nga waray koordinasyon ngan waray salabutan an LGU salit nakakaghatag ini hin dugang nga peligro. Nagsuhestyon gihapon an mga lideres nga himoon an pagpa-uli hin batches ngan mayda bastante nga panahon antis pa-uli-on an sunod nga batch basi mabakante an mga Quarantine Facilties nga gin-ukyan han naha-una nga grupo.
Naghahangyo gihapon an mga gobernador ha DepED nga tugutan hira nga igpagamit an mga eskwelahan nga Quarantine Units paglapos han Hunyo 30 kay mayda pa man magkaka-abot tikang ha iba nga lugar. # (with report from PIA-8)
