Isumat.com/1:23PM, August 27, 2020
Takip-takip an mga insidente hin pagpakamatay an nahipatik ha magkalainlain nga parte han rehiyon han nag-agi nga pira ka adlaw ug yana mismo nga adlaw, Agosto 27.
An gibabag-uhi nga paghikog in natabo kanina han maagahon ha Brgy Catalina, Jiabong Samar. Ginkilala an biktima nga hi Santiago Pacle, senior citizen ngan residente han barangay. Nagpakamatay an biktima pinaagi hin paghigot han iya liog ngadto han kisame han iya payag.
Sumala han mga amyaw ni Pacle, mayda gin-aantos nga sakit an biktima ngan pira na ka beses nga nakabati hira nga nagsering hi Pacle nga titiwasan nala niya an iya kinabuhi kay deri na niya akos an kama-ul-ol nga iya gin-aabat.
Hadin Martes, Agosto 25, usa liwat nga lalaki ha Brgy 83-B San Jose, Tacloban City an naghikog ha parehas nga pamaagi kan Pacle. An biktima ginkilala nga hi Raul Buena, 59-anyos. Natabo an insidente pasado alas 9 han aga. Tobtob yana waray pa igpahayag han mga imbestigador an rason han pag-suicide.
Didto naman ha Anahawan, Southern Leyte, nagpakamatay an 20-anyos nga hi John Paul Bellalino pasado alas 6 han gab-i hadin Agosto 23. Natabo ini sulod mismo han ira balay ha Brgy Calintaan. Dida han imbestigasyon, nadiskubre han iroy han biktima nga nabitay an iya anak pinaagi hin nylon cord nga iginhigot ha kisame.
Gindara ha hospital hi Bellalino pero igindeklarar nga Dead on Arrival. Nagsering an pamilya han biktima nga posible an hinungdan an pagkabulag ni Bellalino ngan han iya oyab. Nagin mabidoon hin duro an biktima ngan duha na ka beses nag pruweba paghikog antis adto nga panhitabo kun diin nadayon na gud an iya pagpakamatay.
Ha luyo nga bahin, mayda naman burod nga babaye an nag-utod han iya kinabuhi ha Brgy Polangi, Calbiga, Samar. Natabo ini pasado alas 7 han gab-i hadton Agosto 20. An biktima amo an 24-anyos nga hi Jessa Nablo. Hiya in upat ka bulan nga burod, may ka-live-in partner ngan may anak.
Naghikog gihapon an biktima pinaagi han paghigot hin pisi ha iya liog ngadto han kisame. Ha inisyal nga imbestigasyon, gintutudlok han asawa han biktima nga posible depresyon an rason han panhitabo. #
