Isumat.com/3:34PM, August 13, 2020
Dako nga pag-ayat han kapasidad ngan talento ni Xyza Rufel Gula ha larangan han volleyball nga magin miembro han high school team han University of Santo Tomas.
Pira pala ka adlaw an nag-agi, an 16-anyos nga hi Xyza an pormal nga ginpasabot han UST Volleyball Coaching Staff nga kaapi na hiya han Team A han Junior Golden Tigresses nga nakikigkumbati ha UAAP ngan iba pa nga mga liga ha Metro Manila ngan iba pa nga parte han nasud.
Nagsumat hi Xyza nga nasorpresa hiya ug an iya pamilya hini nga panhitabo kay damo man an magkarit nga magmurulay ha Pilipinas pero napili hiya han UST. Ini in nagdurot hin dako nga kalipayan ha iya labi na nga tikang pa hadto, iya na hingyap nga makagmulay para han UST. Para ha iya, dako an iya pagtapod nga mapapa-uswag pa an iya abilidad kun ha UST hiya magmumulay. Labot la han UST, nakakarawat gihapon hiya hin mga offers nga magin kaapi han varsity teams han Adamson University, University of the Philippines, University of San Jose-Recoletos ngan South Western University.
Hi Xyza in usa han mga harigi han Secondary Girls Team han Region 8. Tikang han Grade 4 pala hiya tobtob han upat ka tuig ha Junior High School, pirmi hiya kaapi han EVRAA Team nga nakikiglantugi ha Palarong Pambansa. Pira na gihapon ka beses nga nag-representar hiya han rehiyon dida han Rebisco National High School Championships. Dida hini nga mga liga iya iginpakita an iya potensyal nga magin volleyball star ha maabot nga mga panahon.
Kaapi hiya han Team Tacloban nga nagin “3-Peat Champions” han EVRAA.
Open-Hitter an iya posisyon ha volleyball ug iya gin-iidolo an mga banggi-itan nga spikers ngahira Sisi Rondina nga tikang ha UST ug hi anay Ateneo player Alyssa Valdez. Hi Xyza in hitaas gihapon an layog ngan makusog humapak han bola sugad han iya mga idolo.
Hapagkayana, nagpapadayon an iya pagpa kondisyon denhi ha Tacloban ngan malakat hiya ngadto ha Manila kun mayda na go-signal an UST ngan puede na magmurumlay kun igtugot na han National COVID Task Force.
Tim-os an pagpasalamat ni Xyza han mga coaches ha aton dapit nga dako an nahibulig nga maba-id an iya talento. Lakip denhi hira STEFTI Coach Helen Lora, EVRAA/Tacloban Coach Irene Roa, Priscillo Oladive, labi na gud kan Karl Chan nga amo an natindog nga “father figure-coach” han ira grupo.
Hi Chan in nagpahayag nga hadto pa naka-obserbar na hiya han potensyal ni Xyza nga magigin makarit nga player. Gintatagusya ni Chan an abilidad ni Xyza ha opensa, ngan ginsasagdunan liwat niya hi Xyza nga maningkamot ngan pakurukusgon an iya pag-depensa. Hi Chan amo an namumuno han Volleyball Association of Leyte-Tacloban City.
Ha pag-api niya ha UST Varsity, masunod hiya han dalan nga gin-agi-an ni Alina Bicar. Hi Bicar in nagtikang gihapon han iya volleyball career denhi ha Tacloban ngan nahingadto ha UST ug nagin Team Captain han Womens’ Collegiate Team. Adto gihapon ha UST komo kaapi han Mens Collegiate Team an Taclobanon nga hi Gem Corda.
Ginhihingyap ni Xyza nga katapos niya han Senior High, makakasulod gihapon hiya ha Collegiate Team han UST, ngan kun swertihon hiya, inop gihapon niya nga magin miembro han RP Team. Gintatarget niya nga magin Professional Player paghagos hin lima ka tuig tikang yana.
An 5’5″ nga hi Xyza in magigin Grade 11 yana ha Senior High ngan makakagmulay hiya dayon ha UAAP kun magpapas na an krisis han pandemya. Kun tumamak na hiya ha kolehiyo, plano niya nga kumuha han kurso nga BS Entrepreneurship o Business Administration. Nag-eskwela hiya ha STEFTI denhi ha Tacloban tikang han elementarya ngan Junior High.
Hiya an ika-upat ngan manghod nga anak nira Atty Rogelio ngan Maria Rufelie Gula. An iya kuya in na-eskwela ha UST sanglit mayda niya igkaka-upod nga bugto didto.
An paborito nga darahunon ni Xyza amo ini: “The sky has no limits. Neither should you.” Kun ini nga puplunganon an magigin giya ha iya kinabuhi, waray duda nga magigin malamrag an iya bitu-on ha larangan han volleyball ha ti-arabot nga mga panahon. #
