Isumat.com/Agosto 01, 2022
Duha nga magbaysay nga daraga han Eastern Visayas in makikigpaisan-isan ha mga international beauty pegeants katapos la nga maka-angkon hira hin mga titulo han gindumara nga Binibining Pilipinas 2022 ha Manila kakulop, Hulyo 31, 2022.
Hi Gabrielle Camille Basiano nga nagrepresentar han Borongan City, Eastern Samar an nakadaog han Binibining Pilipinas-Miss Intercontinental, samtang an taga Tacloban City nga hi Chelsea Fernandez an nakoronahan nga Binibining Pilipinas-Miss Globe.
Hi Basiano in mabiyahe hiton Oktubre ngadto ha Egypt para han Miss Intercontinental nga kompetisyon, samtang hi Fernandez in mapakadto ha Albania para han Miss Globe 2022 ha pareho nga bulan.
An duha nga mga taga Rehiyon Ocho in damo na an gindara nga mga onor ngan pasidungog para han Eastern Visayas kay nakadaog na hira hin damo nga titulo han nakalabay nga mga kompetisyon.
Labot la han Binibing Intercontinental, nakuha gihapon ni Basiano an special awards han Best in Swimsuit ngan Best in Evening Gown.
Hi Basiano in nagin Miss PRISAA hadton 2017, Top 20 Miss Earth Phils 2018, 1st Runner-up Miss Friendship Intl ha China hadton 2019 ngan 1st Runner-up hadto han Binibining Pilipinas.
Ha luyo nga bahin, hi Fernandez in nagin 2018 Reyna ng Aliwan Fiesta, Miss Phils Earth-Water 2019, Miss Bikini Phils 2020, ngan National Director han Miss Face, Intelligence, Toned Physique Philippines.
Han yana nga Bb Pilipinas 2022, hiya an nakadaog han special award nga Miss Ever Bilena.
Hira Basiano ngan Fernandez in namagtapos han ira kolehiyo ha Asian Development Foundation College, Tacloban City. #
