Isumat.com/Marso 17, 2022
Nag-antos hin gulpi nga kapi-angan an CPP-NPA-NDF ha Rehiyon Otso tungod han kamatay hin usa nga hitaas nga opisyal han kumunista nga kagi-usan dida hin engkwentro kontra han mga tropa han gobyerno ha Jiabong, Samar, Marso 16, 2022.
Binawi-an gihapon hin kinabuhi an asawa han NPA official nga nagkakapot liwat hin posisyon dida han terorista nga hugpo durante han insidente.
Ha impormasyon nga nahikay han Isumat.com, ginkilala an mga namatay nga hira Amado Adelantar, alyas Kumander Butil, 69 anyos, miembro han Executive Committee/Secretariat han Eastern Visayas Regional Party Committee ngan adviser han Sub-Regional Committee Browser; ug an iya misis nga hi Marie Norie Adelantar, finance officer han SRC Browswer.
An duha nga mga opisyales han NPA in parehas nag-uukoy ha Paranas, Samar.
Hi Kumander Butil in nahisumat nga may nakapatong nga reward money kantidad hin 2.9 Milyones pesos para han iya kadakop.
Dida han notisya, may impormasyon nga nakarawat an Jiabong Police Office mahitungod han presensya hin armado nga mga tawo ha Brgy Alejandria. Hinungdan hini, naghurma hin Operating Team nga ginkokomponer han kapulisan ngan mga kasundaluhan han 87th Infantry Battalion basi manginano han sitwasyon didto han mao nga barangay.
Pag-abot didto han lugar, ginpa=arakan hin bala an mga tropa han gobyerno tikang han grupo ni Adelantar sanglit nagkaada na hin pinusilay ngan naigo an kumander ug an iya misis. Kadagmitan naman nga umiskapo an ira mga kaupdanan.
Hi Kumander Butil in naatubang hin mga kaso nga frustrated murder, frustrated homicide, lima ka ihap hin attempted murder, ngan robbery with homicide. Hiya gihapon an gintutudlok nga lider han grupo han NPA nga responsable pagpatay hin duha nga miembro han 34th Infantry Battalion han Philippine Army hadton Hunyo 2002 ha San Jose de Buan, Samar.
An mga tropa han gobyerno in nakarekupo dida han lugar han asdangay hin 9mm pistol, duha nga granada, magazine hin bala ngan mga dokumento.#
