(Image by autogear.ph)

Isumat.com/Marso 17, 2022

“FUEL PRICE ROLLBACK IS WAVING!”

Hitaas an posibilidad nga ha katapus-tapusan magkakamay-ada hin pag-atras an presyo han fuel products sunod nga semana, ngan ini in magigin Big-Time Rollback.

Sumala han mga eksperto ha industriya han lana, dida han kanan Lunes ngan Martes (Marso 14-15, 2022) nga International Oil Trading, naghabubo an mga presyo han nasabi nga mga prudukto.

Kun magpapadayon ini nga hulagway tobtob hiton Biernes nga adlaw, posible nga magmemenos hin 12 pesos an presyo han kada litro han diesel, 6 pesos ha gasolina ngan 8 pesos ha petrolyo. Pero ginklaro han mga analysts nga banabana la ini kay deri pa man segurado an trading tobtob hiton Biernes.

Nagsering an mga eksperto nga an pagmenos han presyo ha world market in tungod han paghabubo han panginahanglan han produkto han krudo ha China kay damo nga negosyo ngan pabrika an nagsara tungod han bag-o nga Covid Surge didto. Tungod hini, damo an abilable nga supply hin fuel products.

Upod na gihapon denhi an pagpadayon han negosasyon ha butnga han Russia ngan Ukraine, sanglit nakaghatag hin paglaum nga matatapos an kasamok didto.

Didto ngani ha Metro Manila, mayda na pira nga small players han industriya an nagpatuman hin rollback nga 3 pesos kada litro tinikangan kakulop (Marso 16).

Nababatasan na nga kada Martes nga adlaw amo an pagkaada hin fuel price adjustment denhi ha Pilipinas ngan babantayan ini dida hiton Marso 22, 2022, sunod nga Martes.

Kun matabo ini nga rollback, ini an gisasyahani nga pag-atras han presyo yana nga tuig kay tikang umentra an 2022, napulo na ka semana nga pirmi gintatampalo an mga Pilipino hin pag-umento han presyo han fuel products. #