Isumat.com/8:19AM, October 10, 2020
Ginmamalahimo nga matapos na ha bulan han Disyembre an maiha na nga ginpipinamulat nga San Juanico Bridge Aesthetic Lighting Project.
Nagpasamwak an Department of Tourism-Eastern Visayas nga bumalik na ha pagpadayon han trabaho katapos hin pira ka bulan nga nadelatar tungod han limitado nga gi-os han katawhan dara han pandemya han Covid-19.
Nagsering hi Tourism Regional Director Karina Tiopes nga hadin Setyembre bumalik na an mga trabahador ngan ginpapaningkamutan nga matapos na ini antis an Pasko. An mao nga proyekto in balor hin 80 Milyones pesos.
An gobyerno han Probinsya han Samar amo an mag-aabaga han gastos han pagbayad han kuryente hini nga proyekto.
Ginlalauman nga makakahatag ini hin dako nga income para han lokal nga turismo ngan makakabulig ha ekonomiya han bug-os nga rehiyon.
Hadin Abril o Mayo pa unta natapos ini, pero tungod han bunal han pandemya, na-atrasar an pagtrabaho. Ini nga pagpa-anyag han tulay in kaparte han Spark Samar, usa nga programa han probinsya para han turismo.
Kun matapos na ini, magkakaada hin unom ka beses kada gab-i nga tag-10 minutos nga pasundayag han magkalainlain nga mga kolor hin suga nga igtata-od han tulay. An kolor han mga suga in madepende kun ano an okasyon nga gintitigaman sugad han Valentines, Pasko, Semana Santa ngan mga importante nga selebrasyon han nasud ngan Eastern Visayas. #
